Բյուրական գյուղի մերձակա սարում բռկված հրդեհը դեռեւս չի հաջողվում մարել: Հրշեջներն աշխատել են ամբողջ գիշեր: Այսօր առավոտյան արդեն պաշտպանության նախարարության ուղղաթիռով հետախուզել են տարածքը, ճշտել հրդեհի օջախների վայրերը: Ուղղաթիռի օգնությամբ առավել վտանգավոր տեղամասեր փրկարար-դեսանտայինների են իջեցրել: Նրանք պետք է տեղայնացնեն ու մարեն հրդեհի օջախները: ԱԻՆ-ի տվյալներով՝ դեռեւս պասիվ ծխացող օջախներ կան: Ընդհանուր առմամբ, 80 հա տարածք է այրվել: Հարակից բնակավայրերին, սակայն, վտանգ չի սպառնում:
Այսօր կայացել է Անդրիաս Ղուկասյանի գործով երկրորդ դատական նիստը: Նիստի մեկնարկին Ղուկասյանն ինքնաբացարկ է հայտնել մեղադրող Պետրոս Պետրոսյանին: Նա հայտարարել է, որ կողմնակալ նախաքննություն է իրականացվել, դատախազը 3 տասնյակից ավելի բողոքների վերաբերյալ որոշում է կայացրել մեկ օրում, սակայն գործնականում հնարավոր չէր այդքան կարճ ժամանակահատվածում ծանոթանալ բոլոր նյութերին: Սա, Ղուկասյանի համոզմամբ, վկայում է այն մասին, որ քաղաքական պատվեր է կատարվել: Դատարանը մեղադրյալի ինքնաբացարկի միջնորդության վերաբերյալ որոշումը կհրապարակի հաջորդ դատական նիստում: Իսկ մինչ այդ, լրագրողների հետ զրույցում Անդրիաս Ղուկասյանն ասել է, որ չի ընդունում իրեն առաջադրված մեղադրանքը, քանի որ դրանում հանցակազմ չկա:
Հոգեբան Ռուբեն Պողոսյանի մահվան գործով ստացվել է մեղադրյալի դատահոգեբուժական փորձաքննության եզրակացությունը: Դրա համաձայն՝ մեղադրյալը տառապում է շիզոֆրենիայով, իսկ Պողոսյանին դանակահարելիս հոգեկան հիվանդագին խանգարվածության վիճակում է եղել: Արդյունքում մեղադրյալն անմեղսունակ է ճանաչվել: Հոգեբանին դանակահարել էր «ԱՅԳ» հոգեբանական կենտրոնի այցելու Հրանտ Համբարձումյանը: Դեպքը տեղի է ունեցել հուլիսի 17-ին, իսկ հուլիսի 20-ին հոգեբանը հիվանդանոցում մահացել է: Քննչական կոմիտեն միջնորդություն է ներկայացրել դատարանին` մեղադրյալին հոգեբուժական հիվանդանոցում տեղավորելը որպես անվտանգության միջոց կիրառելու վերաբերյալ: Միջնորդությունը բավարարվել է:
Երեւանում ողբերգական ավտովթար է տեղի ունեցել: Աճառյան փողոցում բախվել են Opel, Hummer եւ Nissan մակնիշների մեքենաները: Վթարի հետեւանքով 11-ամյա աղջիկ է մահացել: Եվս երկու մարդ վիրավորվել է: Ըստ տեղեկությունների՝ Hummer-ի վարորդը «Գառնիի Սուրիկի Լավաշ» ընկերության սեփականատիրոջ թոռն է:
Բրիտանական The Guardian պարբերականը բացահայտումներ է արել Ադրբեջանի իշխող վերնախավի գաղտնի «սեւ դրամարկղի» մասին: Արտահոսած տվյալները բրիտանական կեղծ ընկերությունների միջոցով փողեր «լվանալու» եւ Ադրբեջանի կողմից 16.000 գաղտնի վճարում կատարելու մասին են: Ալիեւները 3 մլրդ դոլար են վճարել լոբբիստների, լրագրողների եւ քաղաքական գործիչների՝ ադրբեջանամետ որոշումներ կայացնելու համար: Էստոնական Danske Bank-ը հաստատել է, որ իր մասնաճյուղի միջոցով նույնպես «փողերի լվացում ու ապօրինի այլ գործողություններ» են կատարվել: Հիշատակվում է նաեւ ԱՄՆ նախագահի անունը. Բաքվի Trump Tower նախագծում Դոնալդ Թրամփի գործընկերները նույնպես օգտվել են «սեւ դրամարկղից»:
Հայաստանի ֆուտբոլի Ազգային հավաքականը երրորդ անընդմեջ պարտությունը կրեց աշխարհի 2018 թվականի առաջնության ընտրական փուլի եվրոպական գոտու մրցաշարում: Սեպտեմբերի 4-ին Երեւանում անցկացված Հայաստան-Դանիա հանդիպմանը մեր ֆուտբոլիստները դանիացիներին պարտվեցին 1:4 հաշվով: Արդյունքում մեր ընտրանին վերջնականապես զրկվեց առաջնության ուղեգիր նվաճելու բոլոր հնարավորություններից: Հայաստանի հավաքականը հաջորդ ընտրական խաղը կանցկացնի հոկտեմբերի 5-ին՝ Երեւանում մրցելով Լեհաստանի հավաքականի հետ: Այդ խաղից 3 օր անց Արթուր Պետրոսյանի թիմը կհյուրընկալվի Ղազախստանի հավաքականին եւ կավարտի ելույթն աշխարհի 2018 թվականի առաջնության ընտրական փուլում:
Սեպտեմբերի 5-ին դոլարը փոքր-ինչ թանկացել է, իսկ եվրոն շարունակում է զիջել դիրքերը: Դոլարի փոխարժեքն արդյունքում կազմել է 478 դրամ, եվրոյինը՝ 568, ռուբլունը՝ 8 դրամ 27 լումա, բրիտանական ֆունտինը՝ 618 դրամ:
Սեպտեմբերի 6-ին հանրապետությունում սպասվում է առանց տեղումների եղանակ, իսկ 7-ին, առավելապես հյուսիսային շրջաններում, երեկոյան ժամերին կարճատեւ անձրեւ եւ ամպրոպ կլինի: Երեւանում նույնպես վաղը տեղումներ չեն սպասվում: Մայրաքաղաքում գիշերը կդիտվի +20+22, ցերեկը՝ +35+37 աստիճան տաքություն:
