Երեւանի Ավան եւ Նոր Նորք վարչական շրջանների ընդհանուր իրավասության դատարանում, այսօր՝ սեպտեմբերի 6-ին, «Սասնա ծռերի» գործով դատական նիստի ժամանակ դատավոր Արտուշ Գաբրիելյանը դատարանի դահլիճից հեռացրեց ամբաստանյալ Արայիկ Խանդոյանին: Նա հայտարարեց, որ Խանդոյանն անհարգալից վերաբերմունք է դրսեւորել դատարանի նկատմամբ:
Արայիկ Խանդոյանի պաշտպան Արա Կարագյոզյանը առարկեց, որ իր պաշտպանյալն ընդամենը ջուր էր ուզում, քանի որ առողջական խնդիր ունի:
Արտուշ Գաբրիելյանն անդրդվելի մնաց եւ այնուամենայնիվ իր որոշումը չփոխեց:
Նշենք, որ Արայիկ Խանդոյանին նիստերի դահլիճից հեռացրին ոստիկանները: Արա Ղարագյոզյանը նշեց, որ ամբաստանյալին կարող են հեռացնել միայն դատական կարգադրիչները, ինչը դատավորն անարձագանք թողեց: