Ադրբեջանը մեկուսանում է միջազգային խաղի բոլոր կանոններից։ Այս մասին սեպտեմբերի 6-ին Ազգային ժողովում լրագրողների հետ զրույցում ասաց ՀՀ ԱԳ փոխնախարար Շավարշ Քոչարյանը։
Նրա խոսքով՝ Ադրբեջանը չարաշահում է ԵԱՀԿ Մինսկի խմբի համանախագահների հավասարակշռված մոտեցումը։ ԵԱՀԿ գործող նախագահի անձնական ներկայացուցիչ, դեսպան Անջեյ Կասպրշիկի հայտարարությանն անդրադառնալով՝ նա նշեց (Կասպրշիկի խոսքով՝ ԵԱՀԿ դիտորդական առաքելություն իրականացնող խումբն ի վիճակի չէր հասկանալ, թե օգոստոսի 31-ին ԵԱՀԿ վերջին մշտադիտարկման ժամանակ հնչած կրակոցները որ կողմից էին՝ չնայած Հայաստանի ԱԳՆ-ն պաշտոնապես հայտարարել էր, որ դիտարկման ժամանակ ադրբեջանական ուժերը խախտել են հրադադարի ռեժիմը)․ «Բնականաբար, եթե հայտարարությունը հասցեական չէ, դա խրախուսում է Ադրբեջանին դիմել նման նոր քայլերի։ Բայց ընդհանուր առմամբ, մենք տեսնում ենք, որ Ադրբեջանը մեկուսանում է միջազգային խաղի բոլոր կանոններից։ Չնայած նման վարքագծով Ադրբեջանը մեկուսանում է միջազգային խաղից՝ հայկական կողմը չպետք է իրեն հուսալիորեն պաշտպանված զգա։ Առաջին հերթին մենք պետք է հույսներս մեր ուժերի վրա դնենք»։
Խոսելով ՀՅԴ-ի առաջարկության մասին, համաձայն որի՝ Հայաստանը պետք է միակողմանի կարգով իրագործի Վիեննայի եւ Սանկտ Պետերբուրգի պայմանավորվածությունները, քանի որ այդ դեպքում այլեւս հայտարարություններ չեն լինի, թե հասկանալի չէ, թե որ կողմն էր կրակում, Քոչարյանն ընդգծեց․ «Այսօր եւս ամբողջ շփման գծի երկայնքով սարքավորումներ կան, որն ամեն ինչ արձանագրում են։ Խնդիրը տեսագրության մեջ չէ։ Ասեմ ավելին՝ միջնորդ երկրներն այն պետություններ են, որոնք ադ ամենը տիեզերքից դիտարկելու հնարավորություն ունեն։ Հարցը խախտումներն արձանագրելուն չի վերաբերում, այլ այն լիազորված խմբին, որը դրա հիման վրա համապատասխան եզրակացություններ պետք է անի»։
Փոխնախարարը հիշեցրեց, որ Ադրբեջանը համաձայնել է նման համակարգերի տեղադրմանը, սակայն մին օրս խոչընդոտում է դա կյանքի կոչելու գործընթացին։