«Սասնա ծռերի» գործով հերթական նիստին ընդառաջ՝ դատական կարգադրիչները կրկին փորձել են խուզարկել պաշտպաններին: Եթե Տիգրան Հայրապետյանն ու Արա Զաքարյանը կարողացել են «համոզել», որ մետաղորսիչ սարքն արձագանքում է միայն պայուսակի մետաղական հատվածին, Լուսինե Սահակյանին ու Մուշեղ Շուշանյանին դա չի հաջողվել եւ կարգադրիչները նրանց պարզապես արգելել են մուտք գործել դատարան: Լուսինե Սահակյանն ասել է, որ իր պայուսակում միայն անձեռոցիկ կա, սակայն նրան, ամեն դեպքում, արգելել են մտնել: Նիստի մեկնարկին էլ դատավոր Արտուշ Գաբրիելյանը նախ դահլիճից հեռացրել է ամբաստանյալներից Արայիկ Խանդոյանին, ապա դատական սանկցիաներ է կիրառել փաստաբաններ Սահակյանի եւ Շուշանյանի նկատմամբ: Դատավորի այս որոշումից հետո դահլիճից հեռացել է նաեւ փաստաբան Արայիկ Պապիկյանը: Շուրջ երկու ժամ անարդյունավետ աշխատանքից հետո նիստը մեկ շաբաթով հետաձգվել է: Նշենք, որ այս գործով դատաքննության փուլ դեռեւս չի սկսվել:
Երեւանում երեկ տեղի ունեցած ողբերգական վթարի գործով ձերբակալվել է Կոտայքի Ձորաղբյուր գյուղի 27-ամյա բնակիչ Լեւոն Հակոբյանը: Նա վթարի ենթադրյալ մեղավորն է: Նա փրկարարական ծառայությունում է աշխատում: Հակոբյանը ոստիկանություն է ներկայացել եւ խոստովանել, որ Honda մակնիշի ավտոմեքենայով ճանապարհի չթույլատրված հատվածում շրջադարձ է կատարել եւ խոչընդոտել է Hummer-ի երթեւեկությանը, ինչն էլ ողբերգական ավտովթարի պատճառ է դարձել:
Հիշեցնենք, որ վթարի հետեւանքով 11-ամյա աղջիկ է մահացել, 3 մարդ, որոնք զոհվածի հարազատներն են, մարմնական վնասվածքներով հիվանդանոց են տեղափոխվել: Ավելի վաղ վթարի մեղավոր էր համարվում Hummer-ի վարորդը, ըստ տեղեկությունների՝ նա հայտնի «Գառնիի Սուրիկի Լավաշ»-ի Սուրիկի թոռն է: Նշվում էր, որ նա գերազանցել է սահմանված արագությունը, իսկ որպես վթարի մասնակից նշվում էին Opel, Hummer եւ Nissan մեքենաները: Այսօր տարածված տեսանյութի արդյունքում, սակայն, հայտնի դարձավ վթարի չորրորդ մասնակցի՝ Լեւոն Հակոբյանի Honda ավտոմեքենայի մասին, որը պատահարի հետեւանքով չի տուժել:
Լոռիում արտակարգ դեպք է տեղի ունեցել. Նեղոցի գյուղապետը վիճաբանել ու ատրճանակով սպառնացել է Սուրբ Աստվածածին վանքի քահանա Տեր Հեթումին: Ըստ տեղեկությունների՝ գյուղապետ Վարդան Աթանեսյանն այցելել է Ախթալայի բնակիչ Գոռ Թարվերդյանին՝ Տեր Հեթում քահանային, վիճաբանել նրա հետ եւ պահանջել, որ նա բացի վանքի դարպասները: 35-ամյա գյուղապետը սպառնացել է. եթե քահանան չկատարի իր «հրամանը», կկոտրի դարպասները: Տեր Հեթումն իրավապահներին հայտնել է, որ գյուղապետն այդ ամբողջ ընթացքում ձեռքին ատրճանակ է ունեցել, բայց գործի չի դրել: Գյուղապետին ոստիկանություն են հրավիրել, բայց նա հրաժարվել է կատարվածի մասին որեւէ բացատրություն տալ: Փաստի առիթով հետաքննություն է սկսվել:
Հայաստանն ու Ռուսաստանը որոշել են զորքերի կազմը, որոնք գործելու են ՀՕՊ Միացյալ տարածաշրջանային համակարգի շրջանակում: Առայժմ չի նշվում, սակայն, թե ինչ զորքեր են ներառվելուո միավորված համակարգում: Կողմերն արդեն մշակում են համաձայնագրի իրականացմանն ուղղված փաստաթղթերը: Համաձայնագիրը ստորագրվել է Մոսկվայում 2015-ի դեկտեմբերի 23-ին: 5-ամյա ժամկետով փաստաթուղթը 5-ական տարով երկարաձգելու հնարավորություն կա: Ռուսաստանը նման համաձայնագրեր ունի նաեւ Բելառուսի եւ Ղազախստանի հետ: Հայաստանի պարագայում, սակայն, համակարգը ոչ թե միասնական, այլ միավորված կլինի՝ ընդհանուր սահմանի բացակայության պատճառով:
Սեպտեմբերի 6-ին դոլարն էժանացել է, հիմնական մյուս արժույթները՝ թանկացել: Դոլարի փոխարժեքն արդյունքում կազմել է 478 դրամ, եվրոյինը՝ 570, ռուբլունը՝ 8 դրամ 33 լումա, բրիտանական ֆունտինը՝ 623 դրամ:
Սեպտեմբերի 7-ին հանրապետության առավելապես հյուսիսային շրջաններում երեկոյան ժամերին կարճատեւ անձրեւ եւ ամպրոպ կլինի: Օդի ջերմաստիճանը սեպտեմբերի 7-8-ին 4-5 աստիճանով կնվազի: Երեւանում նույնպես երեկոյան ժամերին տեղումների հավանականություն կա: Մայրաքաղաքում գիշերը կդիտվի +20+22, ցերեկը՝ +32+34 աստիճան տաքություն: