Վրաստանում հայկական ավտոբուսի մասնակցությամբ խոշոր վթար է տեղի ունեցել: Ռուսական համարանիշով Mercedes-ը բախվել է Ռուսաստան մեկնող ավտոբուսին: Պատահարի հետեւանքով զոհվել են Mercedes-ի ուղեւորներից Լուսինե Մինասյանն ու նրա 7-ամյա որդին: Նրանք Ռուսաստանի քաղաքացի էին: Իսկ մեքենայի վարորդն ու մյուս 2 ուղեւորները՝ 12 եւ 24 տարեկան, տեղափոխվել են Մցխեթայի հիվանդանոց: Ավտոբուսի ուղեւորներից ոչ ոք չի հոսպիտալացվել:
Նշենք, որ ավտոբուսը մի քանի շաբաթ առաջ 450 հազար դրամով տուգանվել է տրանսպորտի նախարարության կողմից: Այն ոչ կանոնավոր ուղեւորափոխադրումներ էր իրականացնում դեպի Ռուսաստան: Նախարար Վահան Մարտիրոսյանի ներկայացրած նախնական տեղեկություններով՝ պատահարի մեղավորը Mercedes-ի վարորդն է եղել:
Արցախում տեղի է ունեցել Բակո Սահակյանի երդմնակալության արարողությունը: Նորընտիր նախագահը երդվել է Ազգային ժողովի հատուկ նիստում՝ Պարգեւ Սրբազանի օրհնությունից հետո: Բակո Սահակյանն Արցախի Հանրապետության նախագահ է ընտրվել երրորդ անգամ: Նոր Սահմանադրության համաձայն՝ Ազգային ժողովը նրան անցողիկ շրջանի նախագահ է ընտրել հուլիսի 19-ին: Բակո Սահակյանը կպաշտոնավարի մինչեւ 2020 թվականը, որից հետո տեղի կունենան համապետական ընտրություններ:
Հայաստանի սահմանամերձ գյուղերի արտոնությունները կերկարաձգվեն մինչեւ 2021 թվականը: Որոշումը հաստատվել է կառավարության այսօրվա նիստում: Խոսքը 37 բնակավայրերում գազի, էլեկտրաէներգիայի եւ ոռոգման ջրի վճարների պետական սուբսիդավորման մասին է: Անմիջականորեն հակառակորդի կրակի տակ գտնվող բնակավայրերում էլ կփոխհատուցեն հողահարկն ու գույքահարկը:
Վարչապետը մտահոգություն է հայտնել խեցգետնի քանակության նվազման առիթով: Կարեն Կարապետյանն իրավիճակը ճգնաժամային է գնահատել եւ հանձնարարել շտապ միջոցներ ձեռնարկել:
Սկանդալային Ամուլսարի ոսկու հանքը կառավարող «Լիդիան Արմենիա»-ին գործադիրն այսօր արտոնություն տվեց: Ընկերությունն այսուհետ սարքավորումներ կներմուծի առանց ԱԱՀ վճարելու: Ըստ զեկուցողի՝ Ամուլսարի հանքում ընկերությունը պատրաստվում է շուրջ 180 մլրդ դրամ ներդնել։ Նշենք, որ բնապահպանները դեմ են այս հանքի շահագործմանը, քանի որ, նրանց պնդմամբ, այն կվնասի տարածքի կենսաբազմազանությանը:
Կառավարության նիստից հետո էլ կրթության նախարարն անդրադարձել է այս օրերի ամենաքննարկվող հարցերից մեկին. ինչո՞ւ Հրազդանի քաղաքապետի որդին, որը մեղադրվում է մահացու վրաերթ կատարելու մեջ եւ հարուցված քրեական գործով որպես մեղադրյալ է ներգրավված, ոսկե մեդալ ստացավ հանրապետության նախագահից: Քննադատություններին ի պատասխան՝ Լեւոն Մկրտչյանը հորդորեց անձամբ գնալ դպրոց ու պարզել քաղաքապետի 16-ամյա որդու գիտելիքները: Հնարավո՞ր է՝ քաղաքապետի որդին ոսկե մեդալը ստացել է հոր հովանավորությամբ կամ սա մեսիջ է, որ նա չի պատժվելու 58-ամյա տղամարդուն մահացու վրաերթի ենթարկելու համար: Լեւոն Մկրտչյանն այդ դատողությունները չհիմնավորված է համարում, ավելին, իր փորձն է հիշեցնում:
Գյուղատնտեսության նախարարից էլ լրագրողները հետաքրքրվել են, թե երբվանի՞ց է որոշել զբաղվել խաղողագործությամբ: Հարցին Իգնատի Առաքելյանը զարմանքով է արձագանքել՝ այսի՞նքն: Հետո հանկարծ հիշել է, որ իր ընտանիքի անդամները խաղողի այգիներ ունեն: Առաքելյանը վստահեցրել է, որ ընտանեկան բիզնեսն իր հետ առնչություն չունի, չնայած այդ ոլորտն իրեն միշտ հետաքրքրել է:
Առողջապահության նախարարին էլ լրագրողներն այսօր, այսպես ասած, նեղն են գցել: Լեւոն Ալթունյանից հետաքրքրվել են հանրապետությունում Լայմի հիվանդության գրանցված դեպքերի մասին: Ի պատասխան՝ նախարարը հորդորել է իրեն միայն մասնագիտական հարցեր տալ: Ինչո՞ւ է Հայաստանում ծնելիության մակարդակը նվազել. այս հարցը նույնպես նախարարն անարձագանք է թողել. կառավարության այսօրվա նիստում այն չի քննարկվել:
«Սասնա ծռերի» 18 անդամների գործով այսօրվա նիստը սկսվել է դատավորի եւ պաշտպանների բանավեճով: Փաստաբանները մեղադրող կողմին ինքնաբացարկի միջնորդություն ներկայացնելու համար պահանջել են, որ դատավորն ապահովի բոլոր փաստաբանների ներկայությունը: Արտուշ Գաբրիելյանն էլ առաջարկել է միջնորդություն ներկայացնել նիստին ներկա փաստաբանների մասնակցությամբ: Պաշտպանները հակադարձել են. վկայակոչել են քրեադատավարական օրենսգրքի դրույթներն ու Գաբրիելյանին մեղադրել օրենսգիրքը ոտնահարելու մեջ:
Բոլոր պաշտպանների ներկայությունն այդպես էլ չի ապահովվել, արդյունքում դահլիճում գտնվողներից Լուսինե Սահակյանը, Հրանտ Գեւորգյանը եւ Արայիկ Պապիկյանը նույնպես հեռացել են: Դատավորը, ամեն դեպքում, շարունակել է նիստը, սակայն քիչ անց հայտարարել է, որ առողջական խնդիրներ ունի եւ հետաձգել է նիստը: Հաջորդը կկայանա սեպտեմբերի 14-ին:
«Իրմա» ավերիչ փոթորիկը մոտեցել է Պուերտո Ռիկոյին: Քամու արագությունը շուրջ 300 կմ/ժ-ի է հասնում, հորդառատ անձրեւներ են տեղում: Փոթորկին վտանգավորության բարձրագույն՝ 5-րդ աստիճան է տրվել: Պուերտո Ռիկոյում արտակարգ դրություն է հայտարարվել, մարդիկ առաջին անհրաժեշտության ապրանքներ են պաշարում: Մինչ այդ, փոթորիկն ավերածություններ է առաջացրել Կարիբյան կզղիներում: Բարբուդա կղզին, որտեղ 1700 մարդ է բնակվում, հիմնահատակ ավերվել է: «Իրմա»-ն մեծ վնասներ է հասցրել նաեւ Ֆրանսիայի ափամերձ տարածքներին: Սեն Բարտ եւ Սեն Մարտեն կղզիները հոսանքազրկվել են, փոթորկի հետեւանքով առնվազն 10 մարդ է զոհվել: ՄԱԿ-ի տվյալներով՝ Ատլանտյան օվկիանոսում երբեւէ գրանցված ամենահզոր այս փոթորկի հետեւանքով կարող է մինչեւ 37 մլն մարդ տուժել: «Իրմա»-ն արդեն տասնամյակի փոթորիկ են կոչել: Այն ավելի զորեղ է «Հարվի» փոթորկից, որի հետեւանքով զոհերի թիվն ամերիկյան Թեխասում 70-ի է հասել:
«Ոսկե ծիրան»-ի տնօրեն Հարություն Խաչատրյանն ազատվել է այդ պաշտոնից: Միջազգային կինոփառատոնի տնօրեն է նշանակվել կինոգետ Սուսաննա Հարությունյանը: Հարություն Խաչատրյանը մեզ հետ զրույցում նշել է, որ «Ոսկե ծիրան»-ից հեռացել է, քանի որ մտադիր է իր թեկնածությունն առաջադրել Կինեմատոգրաֆիստների միության նախագահի պաշտոնում: Ասում է՝ շատերն են առաջարկել առաջադրել թեկնածությունը, արդյունքում որոշել է ղեկավարել Միությունը:
Հայաստանի կինեմատոգրաֆիստների միության նախագահի պաշտոնում թեկնածությունն է առաջադրելու նաեւ ռեժիսոր Վահե Գեւորգյանցը՝ միության նախկին նախագահ, հանգուցյալ Ռուբեն Գեւորգյանցի որդին: Կինեմատոգրաֆիստների միության արտահերթ համագումարը կայանալու է հոկտեմբերի 7-ին, այդ ժամանակ էլ միության նոր նախագահ եւ վարչություն կընտրեն:
Սեպտեմբերի 7-ին դոլարը կայուն է եղել, իսկ եվրոն թանկացել է եւս 2 դրամով: Դոլարի փոխարժեքն արդյունքում կազմել է 478 դրամ, եվրոյինը՝ 572, ռուբլունը՝ 8 դրամ 38 լումա, բրիտանական ֆունտինը՝ 625 դրամ:
Սեպտեմբերի 8-ին հանրապետությունում սպասվում է առանց տեղումների եղանակ: Օդի ջերմաստիճանը սեպտեմբերի 8-ին 3-4 աստիճանով կնվազի, 9-10-ը՝ նույնքան կբարձրանա: Երեւանում նույնպես վաղը տեղումներ չեն սպասվում: Մայրաքաղաքում գիշերը կդիտվի +16+18, ցերեկը՝ +31+33 աստիճան տաքություն: