Պետք է արմատական, հիմնահատակ քանդենք այսօրվա հայկական Բաստիլը՝ ԱԱԾ-ԿԳԲ-ն, եւ այդ քանդումը պետք է տեղի ունենա գաղտնազերծմամբ, այլ ոչ թե մի ինչ-որ բոլշեւիկի անվան փոփոխմամբ: Մենք կողմ ենք համակարգային փոփոխությունների»,- այս մասին, այսօր՝ սեպտեմբերի 8-ին, լրագրողների հետ հանդիպման ժամանակ նշել է «Երկիր Ծիրանի» կուսակցության նախագահ Զարուհի Փոստանջյանը:
Նա ընդգծեց, որ Երեւանի ավագանու նիստերի ժամանակ իրենք ներկայացնելու են օրենսդրական նախաձեռնություններ, սակայն իր 10-ամյա պատգամավորական փորձը ցույց է տալիս, որ այդ նախաձեռնությունները չեն ընդունվում. «Ես լինելով 10 տարի պատգամավոր, տարբեր օրենսդրական նախաձեռնություններով եմ հանդես եկել, բայց բոլշեւիկյան մեթոդի գործունեության հետեւանքով, որը նաեւ այս ավագանիում կա, այդ նախաձեռնությունները հավանության չեն արժանանում: Միայն մի նախաձեռնություն է ընդունվել, որը վերաբերում էր ուրիշի փոխարեն քվեարկող կարգազանց պատգամավորներին պատասխանատվության ենթարկելուն, այն էլ դա բխել է բոլշեւիկների շահերից»:
Զարուհի Փոստանջյանը նշեց, որ քաղաքական համակարգը փոխելու խնդիր կա, որը պետք է անեն նոր քաղաքական ընտրանու ներկայացուցիչները, ոչ թե այն մարդիկ, որոնք այս պահին հանդես են գալիոս որպես քաղաքական ընտրանի:
Նա չբացառեց, որ կարող են նաեւ բոյկոտել Երեւանի ավագանու նիստերը. «Հնարավոր է՝ ընդհանրապես բոյկոտենք ավագանու նիստերը, եթե դրանք օրենքի պահանջներին համապատասխան չընթանան»: