Կրեմլի մշակած նախագահական ընտրարշավի ռազմավարությունը գործնականում պատրաստ է: Այս մասին հայտնում է «Կոմերսանտը»:
Պարբերականի տեղեկություններով՝ նախագահի աշխատակազմին մերձ աղբյուրը լրագրողներին հայտնել է, որ անցյալ շաբաթ թեման քննարկվել է փակ խորհրդակցությունների ընթացքում: Նախագահի պաշտոնում Վլադիմիր Պուտինի առաջադրումը կկատարվի 2 փուլով: Առաջինը նախատեսված է նոյեմբերին, այս ամիս նախագահը ընտրարշավին մասնակցելու սկզբունքային համաձայնություն կտա: «Անհնար է այս հարցը մինչեւ դեկտեմբեր ձգել, այլապես անբնական կընկալվի»,- պարզաբանել է աղբյուրը՝ հավելելով, որ իրադարձության ձեւաչափը նման կլինի նախագահի ուղիղ գծին՝ քաղաքացիների հետ շփում եւ նրանցից առաջադրվելու խնդրանքի ներկայացում:
Երկրորդ փուլում նախատեսվում է Պուտինի, որպես ինքնառաջադրվողի, առաջադրման իրավաբանական ձեւակերպումը: Ստորագրահավաքն ավելի ուշ կսկսվի: «Նախագահի ընտրության մասին» օրենքում նշված է, որ ընտրությունների նշանակումը պետք է տեղի ունենա դեկտեմբերի 7-ից 17-ը: Դրանից հետո ոչ ուշ, քան 20 օր անց (մինչեւ հունվարի 6-ը) տեղի կունենա ԿԸՀ-ում նախաձեռնող խմբի գրանցումը:
Ռուսաստանի նախագահի ընտրությունները տեղի կունենան 2018 թվականի մարտին: