Մեծ Բրիտանիան ցանկանում է «Բրեքզիթից» հետո ավելի սերտորեն համագործակցել Եվրոպական Միության հետ պաշտպանության բնագավառում։ Այս մասին հաղորդում է Reuters գործակալությունը՝ հղում անելով մի փաստաթղթի, որտեղ շարադրված է «ամուր անվտանգության բնագավառում գործընկերության» սկզբունքը։
Փաստաթղթում նշվում է, որ Մեծ Բրիտանիան «անվերապահորեն հավատարիմ է» մնում եվրոպական անվտանգության սատարմանը, ցանկանում է իր դուրս գալուց հետո ռազմական ակտիվները ներդնել Եվրամիության գործողություններում և շարունակել գաղտնի տեղեկությունների փոխանակումը։
Ընդգծելով, որ Մեծ Բրիտանիային է պատկանում Եվրոպայում պաշտպանության և զարգացման բնագավառի ամենամեծ բյուջեն, պաշտոնական անձինք պնդում են, որ իրենց ամենաուժեղ փաստարկներից մեկն են համարում այն, որ Բրիտանիան կարող է սատարել Եվրամիությանը պաշտպանության և անվտանգության բնագավառում։
«Սպառնալիքների ուժեղացման և միջազգային անկայունության ժամանակ Մեծ Բրիտանիան անկոտրում է մնում եվրոպական անվտանգությանը սատարելու իր ձգտման մեջ»,- նշվում է Պաշտպանության Նախարար Մայքլ Ֆելոնի հայտարարությունում։
