Եվրոպայի խորհուրդը մտադիր է Ուկրաինայում ընդունված «Կրթության մասին» նոր օրենքի տեքստի փորձաքննություն կատարել:
Վկայակոչելով ԵԽ մամուլի ծառայությանը՝ «ՌԻԱ Նովոստի»-ն հայտնում է, որ փորձաքննությունը կկատարեն տարածաշրջանային եւ փոքրամասնությունների լեզուների խարտիայի մասնագետները:
«Կոմիտեի փորձագետներն անհրաժեշտության դեպքում երկխոսություն կսկսեն Ուկրաինայի իշխանությունների հետ, կլուսաբանեն խնդիրները եւ կխնդրեն պարզաբանում տալ՝ կապված նոր օրենքի կիրառման հետ»,- հավելել են ԵԽ-ից: Գործակալության զրուցակցի խոսքով՝ օրենքը պետք է համապատասխանի Մարդու իրավունքների պաշտպանության եվրոպական կոնվենցիայի, մասնավորապես նրա ոչ խտրական բաղադրիչին:
Օրեր առաջ Ուկրաինայի Գերագույն ռադան «Կրթության մասին» նոր օրենք է ընդունել, որով խիստ սահմանափակումներ են սահմանվում ազգային փոքրամասնությունների լեզուների օգտագործման վրա՝ 2020 թվականին կրթական համակարգից դրանք լիովին հանելու հեռանկարով: