Միակ ճիշտ ներդրումը Հայաստանում եկեղեցի կառուցելն է: Այս մասին, այսօր՝ սեպտեմբերի 13-ին, ԱԺ-ում լրագրողների հետ զրույցում նշել է ԱԺ փոխնախագահ Էդուարդ Շարմազանովը:

Հարցին, թե ինչպես է գնահատում փաստը, որ մի կողմից ասում են երկրում փող չկա, մյուս կողմից բազմաթիվ եկեղեցիներ են կառուցվում, նա արձագանքեց. «Այո, կողմ եմ, որովհետեւ եկեղեցին միակ վայրն է, որտեղ մարդը մտնում եւ ստանում է դրական էներգիա։ Ես կողմ եմ այդքան եկեղեցիների կառուցմանը։ Միակ, ամենաճիշտ ներդրումը Հայաստանում եկեղեցի կառուցելն է», - ասաց ԱԺ փոխնախագահը։

Դիտարկմանը, թե մեղքերն են քավում եկեղեցի կառուցելով՝ Շարմազանովն ասաց. «Մեղքերը միայն Աստծո մոտ են քավում։ Եկեղեցի կառուցելով չի: Ես հասարակ, սովորական մարդ եմ, ոչ էլ դատավոր եմ՝ որոշեմ՝ ով ինչքան մեղք գործեց, իսկ ով մեղավոր չի։ Սա լուրջ հոգեւոր խնդիր է, ժողովուրդ։ Սկսել ենք պրիմիտիվացնել»։

Մյուս դիտարկմանը, թե կարող են տնտեսությունը զարգացնելու համար ներդրումներ կատարել, ԱԺ փոխնախագահը արձագանքեց. «Ես ձեզ ասում եմ՝ Աստծունը Աստծուն, կեսարինը՝ կեսարին։ Եկեղեցի կառուցելը չի կարելի հակադրել տնտեսության զարգացման հետ։ Ձեռքներդ հեռու պահեք հայ եկեղեցուց»։

Շարմազանովը վրդովվեց, երբ լրագրողը նկատեց, որ եկեղեցին պետք է անջատ մնա պետությունից, բայց Հայաստանում այդպես չէ. «Լավ է արել, բա ի՞նչ պետք է անի, բա կարո՞ղ ա աղանդավորական կազմակերպությունները անե՞ն։ Այո՛, եկեղեցին մեր սուրբ եկեղեցին է, ու պետք է դպրոցներում Հայ եկեղեցու պատմության ժամերը ավելացնեն, ավելին՝ բուհում էլ, ձեր շրջապատում էլ»։