ԱՄՆ Առեւտրի ներկայացուցչի առեւտրային քաղաքականության ու տնտեսության գծով տեղակալ Էդ Գրիսերը Հայաստանից Միացյալ Նահանգներ կատարվող արտահանումների խթանման շուրջ այսօր՝ սեպտեմբերի 13-ին, քննարկումներ է ունեցել Հայաստանի պաշտոնատար անձանց եւ գործարարների հետ:
ԱՄՆ դեսպանատնից NEWS.am-ին հայտնում են, որ հայկական ընկերությունները, օգտվելով «Արտոնությունների ընդհանրացված համակարգ» (GSP) ծրագրից, կարող են արտոնյալ ռեժիմով՝ առանց մաքսատուրքի մուտք գործել ամերիկյան շուկա:
Հայ-ամերիկյան առեւտրային պալատի եւ ՀՀ-ում ԱՄՆ դեսպանության համատեղ ջանքերով կազմակերպված համաժողովում ԱՄՆ առեւտրի ներկայացուցիչները Հայաստանի գործարար համայնքի հետ քննության առան արտահանման հնարավորությունները:
Սա երկրորդ համաժողովն է Հայաստանում, որն անդրադարձ է կատարում GSP արտոնյալ առեւտրային ռեժիմի հետ կապված հարցերին՝ շարունակելով այն քննարկումները, որ 2016թ. թեմայի շուրջ սկսել էր GSP ծրագրի տնօրեն Այմի Լարսենը: GSP-ի հետ կապված այս հանդիպումները կազմակերպվում են ի կատարումն Հայ-ամերիկյան առեւտրի ու ներդրումների խորհրդի շրջանակում ԱՄՆ կառավարության ստանձնած պարտավորությունների:
Իր խոսքում ՀՀ-ում ԱՄՆ դեսպան Ռիչարդ Միլսը շեշտեց, որ ամերիկյան պատվիրակության այցի նպատակը հայ-ամերիկյան առեւտրային հարաբերությունների իրական արդյունքների ներկայացումն է եւ Հայաստանի գործարար համայնքին GSP արտոնյալ ռեժիմի ընձեռած հնարավորությունների ու օգուտների մասին իրազեկելը:
«Շատ գործարարներից ենք լսում, որ բավարար տեղեկացված չեն, թե GSP-ից օգտվելու համար ինչ պայմաններ կան կամ ինչպես պետք է օգտվել դրանից: Այսօր այստեղ գտնվող պատվիրակությունը կներկայացնի այն անհրաժեշտ տեղեկությունները, որոնք անհրաժեշտ են դեպի Միացյալ Նահանգներ Հայաստանի արտահանման ներուժը առավելագույնս օգտագործելու եւ GSP-ի ներքո տրամադրվող արտոնություններից լիարժեք օգտվելու համար», - նկատեց դեսպան Միլսը:
«Որպես դեսպան ինձ համար թիվ մեկ գերակայությունը Հայաստանում եղել է հայ-ամերիկյան գործարար և առևտրային կապերի խորացումը»-ասաց նա և նշեց, որ Էդ Գրիսերը կներկայացնի, թե ինչպես կարող է Հայաստանը մեծացնել արտահանումը դեպի ԱՄՆ:
Արտոնյալ առեւտրային ռեժիմի GSP ծրագիրը սահմանվել է Առեւտրի մասին 1974թ. օրենքով եւ նպատակ ունի խթանել տնտեսական աճը զարգացող երկրներում: Ծրագրի ներքո 3451 ապրանքատեսակ 129 շահառու երկրներից ու տարածքներից, այդ թվում՝ Հայաստանից կարող է ԱՄՆ ներմուծվել արտոնյալ պայմաններով՝ առանց մաքսային վճարների: Քանի որ Հայաստանը ծրագրի շահառու է, հայաստանյան ապրանքների գերակշիռ մասը 2012-2016թթ. ԱՄՆ մուտք են գործել GSP արտոնյալ ռեժիմով: Ներկայումս GSP-ի շրջանակում Հայաստանից ԱՄՆ արտահանվող ապրանքների ծավալը գնահատվում է 25 միլիոն ԱՄՆ դոլարի սահմաններում: Ապրանքները ներառում են ալյումինե փայլաթիթեղից եւ ոսկերչական իրերից մինչեւ ֆերմենտացված ըմպելիքներ եւ բալի ջեմ:
