Նոյեմբերին Հայաստանի եւ Եվրամիության միջեւ նոր համաձայնագրի ստորագրման համար լուրջ խոչընդոտներ չկան: Սեպտեմբերի 13-ին կայացած լրագրողների հետ հանդիպման ժամանակ նման տեսակետ հայտնեց Կովկաս ինստիտուտի տնօրեն, քաղաքագետ Ալեքսանդր Իսկանդարյանը:
Նրա խոսքով՝ այս փաստաթուղթը գործնականում արդեն պատրաստ է: «Ընդհանուր առմամբ, Եվրամիության հետ համաձայնությունը ձեռք է բերվել: Հայկական կողմում, կարծես թե, ամեն ինչ եւս նորմալ է, այսօրվա դրությամբ ես քաղաքական խոչընդոտներ չեմ տեսնում»,- պարզաբանեց Իսկանդարյանը՝ հավելելով, որ այս ամենը վկայում է փաստաթուղթը ստորագրելու մեծ հավանականության մասին:
Փորձագետը միաժամանակ նշեց, որ ներքաղաքական գործոնի տեսակետից Հայաստանում այս փաստաթղթի ստորագրմանը մեծ նշանակություն են տալիս: Սակայն արտաքին քաղաքականության տեսակետից այս համաձայնագիրն ընդամենը կկարգավորի Երեւանի եւ Բրյուսելի միջեւ նոր փոխհարաբերությունները, քանի որ Հայաստանի եւ ԵՄ-ի միջեւ ստորագրված նախկին փաստաթուղթն արդեն վաղուց հնացել է: «Եվրամիության հետ նոր համաձայնագրի նշանակությունը չարժի գերագնահատել»,- եզրափակեց Ալեքսանդր Իսկանդարյանը: