Հայաստանի հանրապետական կուսակցությունը ժողովրդի կամարտահայտման միջոցով պետք է մեկուսացվի իշխանությունից։ Այս մասին սեպտեմբերի 13-ին՝ Ազգային ժողովում լրագրողների հետ հանդիպման ժամանակ, ասաց «Ելք» դաշինքի պատգամավոր Արարատ Միրզոյանը։
Պատասխանելով հարցին՝ արդյոք «Ելք» դաշինքը դեմ կլինի 2018-ին ՀՀ վարչապետի պաշտոնում Կարեն Կարապետյանի թեկնածության առաջադրմանը, Միրզոյանն ասաց․ «Ես չեմ ցանկանում ՀՀԿ-ից վարչապետ կամ ՀՀԿ–ական կառավարություն տեսնել։ Բայց եթե ֆորս մաժոր չկա, եւ ՀՀԿ-ն շարունակի Ազգային ժողովում մեծամասնություն կազմել, այսպես թե այնպես, նրա ներկայացուցիչը վարչապետ կլինի»։
Պատգամավորը նաեւ նկատեց, որ ցանկալի է, որ այդ թեկնածուն Սերժ Սարգսյանը չլինի։ «Եթե վարչապետի թեկնածուն միեւնույնն հանրապետական պիտի լինի, ապա այս պահի դրությամբ, լավ կլիներ, որ նա Սերժ Սարգսյանը չլիներ։ Հակառակ պարագայում, փաստացի դա ստացվում է Սերժ Սարգսյանի պաշտոնավարման երրորդ ժամկետը։ Դա անընդունելի է»,-ընդգծեց Արարատ Միրզոյանը։