«Սասնա ծռերի» գործով ամբաստանյալ Արամ Մանուկյանը չի կարող հեռակա կարգով շարունակել ուսումը, քանի որ գտնվում է կալանքի տակ: Այս մասին, այսօր՝ սեպտեմբերի 13-ին, ԱԺ-ում լրագրողների հետ զրույցում նշել է ՀՀ ԿԳ փոխնախարար Վահրամ Մկրտչյանը։
Նրա խոսքով՝ ինքն՝ անձամբ ծանոթ է խնդրին, սակայն քրեակատարողականի պայմանները չեն համապատասխանում հեռավար կրթություն ստանալուն:
Փոխնախարարն ընդգծեց, որ բազմաթիվ նամակներ է ստացել Մանուկյանի պաշտպանից, զրուցել է բուհերի հետ, բայց այս պահին չկան անհրաժեշտ պայմանները, որոնք թույլ կտան Արամ Մանուկյանին շարունակել կրթությունը։
«Հեռակա կարգով Արամ Մանուկյանը չի կարող սովորել, որովհետեւ կալանքի տակ է։ Քանի որ նա դուրս է մնացել, ցանկանում է հեռավար կարգով վերականգնվել մեկ այլ տեղ։ Ես տարբեր բուհերի եւ ուսումնական հաստատությունների հետ խոսել եմ, օրենքի հետ կապված մի խնդիր ունենք՝ կալանքի տակ գտնվող անձը կարող է հեռավար ուսում ստանալ, եթե քրեակատարողական հիմնարկում եւ բուհում կան համանման պայմաններ։ Այդ երկու պայմաններն ապահովված չեն, հետեւաբար Արամ Մանուկյանը չի կարող վերականագնվել եւ ուսումը շարունակել», - նշեց Վահրամ Մկրտչյանը։
Արամ Մանուկյանը դուրս էր մնացել բուհից դասերից բացակայելու պատճառով։ Վերջինս մեղադրվում է ոստիկանության ՊՊԾ գնդի տարածքի գրավման գործի շրջանակում երկու հոդվածով՝ շենք, շինություններ գրավելը եւ ապօրինի զենք, զինամթերք կրելը եւ փոխադրելը։
Հիշեցնենք, որ Արամ Մանուկյանը (Պավլիկ Մանուկյանի որդին-խմբ) մեղադրվում է ոստիկանության ՊՊԾ գնդի տարածքի գրավման գործի շրջանակում շենք, շինություններ գրավելու եւ ապօրինի զենք, զինամթերք կրելը եւ փոխադրելու հոդվածներով:
