Անհրաժեշտ է ստեղծել այլընտրանքային փաստաբանական միություններ: Այս մասին այսօր՝ սեպտեմբերի 13-ին, գործադուլ անցող փաստաբանների հրավիրած հավաք-քննարկմանն ասաց փաստաբան Արգիշտի Կիվիրյանը:
«Ո՞նց եղավ, որ ունենք ոչ միայն քաղբանտարկյալներ, այլեւ փաստաբաններն են հանդես գալիս որպես քաղհալածյալներ: Նախկինում ունեցել ենք փաստաբանական միություններ, երբեւիցե չենք ունեցել մի իրավիճակ, երբ Փաստաբանների պալատը վերածվել է մի օղակի, որն առաջինն է խախտում փաստաբանների շահերը: Երբ Պալատը սկսեց թիրախավորել փաստաբաններին, ակնհայտ էր, որ այսպիսի լայնածավալ խախտումներ էին տեղի ունենալու»,- ասաց Արգիշտի Կիվիրյանը:
Փաստաբանի խոսքով, տարիներ առաջ անհնար էր պատկերացնել այսպիսի իրավիճակ, որ փաստաբանին կարող էին նման կերպ նվաստացնել:
«Փաստաբանների համար Փաստաբանների պալատն այժմ թիվ մեկ ռեպրեսիվ մարմինն է, որտեղ մարդիկ ֆեյսբուքյան կարծիքի համար պատասխանատվության են ենթարկվում: Միակ ելքն այլընտրանքային փաստաբանական միությունների ստեղծումն է: Բացի դրանից, Պալատը խախտում է իր փաստաբանների իրավունքը, վերածվել է բռնապետական համակարգի: Փաստաբանների պալատի նախագահի ընտրությունները դրա վառ ապացույցն են»,- ասաց փաստաբանը:
