News
Լրահոս
News
Չորեքշաբթի
Նոյեմբեր 22
Տեսնել լրահոսը


Ազգային ժողովն այսօրվա նիստը սկսել է նախօրեին քննարկված հարցերի քվեարկությամբ: Առաջին իսկ օրինագծի քվեարկության ժամանակ դարձյալ խնդիր է առաջացել. Արա Բաբլոյանը հայտնել է, որ գործուղման մեջ գտնվող Արմեն Աշոտյանը հայտարարություն է թողել՝ նշելով, թե ինչպես է պատրաստվում քվեարկել ներկայացված օրինագծերով: «Ելք»-ի պատգամավորները ցանկացել են անձամբ ծանոթանալ հայտարարությանը: Արմեն Աշոտյանի ձայնը, ամեն դեպքում, հաշվարկվել է:

«Երեւանի ինքնակառավարման մասին» օրենքում փոփոխությունների առիթով էլ դժգոհել են Նաիրա Զոհրաբյանն ու Նիկոլ Փաշինյանը: Դահլիճում ներկա իշխող կոալիցիայի պատգամավորների թիվը, սակայն, բավարար է եղել, եւ օրինագիծը 59 կողմ ձայնով ընդունվել է:

Այսօր ներկայացված նախագծերից էլ բուռն քննարկման առիթ է դարձել «Հիփոթեքային վարկավորման մասին» օրինագիծը: Նաիրա Զոհրաբյանը դժգոհել է. բանկերը չնչին տոկոսներով ֆինանսական միջոցներ են ստանում, բայց հաճախորդներին մինչեւ 20 տոկոսով են վարկ տրամադրում, Միքայել Մելքումյանն էլ հավելել է. բանկային համակարգը ծաղկել է մեր քաղաքացիների սնանկացման հաշվին:

Այսօր Ազգային ժողով էին եկել նաեւ կառավարության անդամները՝ վարչապետի գլխավորությամբ: Կարեն Կարապետյանին հարց ուներ «Ելք»-ից Էդմոն Մարուքյանը. ինչո՞ւ վարչապետը պաշտոնավարման մեկ տարվա ընթացքում որեւէ արեւմտյան երկիր չի գնացել, չե՞ն հրավիրել, թե՞ մերժել է հրավերները: Էդմոն Մարուքյանը պնդել է. փոխարենը մի քանի անգամ Մոսկվա եք գնացել:

Նիկոլ Փաշինյանն էլ հետաքրքրվել է բանակի մարտունակությամբ: Հիշեցրել է, որ ամիսներ առաջ վարչապետից տեղեկացան, որ ապրիլյան պատերազմի օրերին ոչ բոլոր տանկերն են մարտական վիճակում եղել, եւ հետաքրքրվել, թե ինչ վիճակ է այսօր: Վիգեն Սարգսյանը վստահեցրել է. զինված ուժերը մարտունակ են, մշտական զորավարժություններն ու ստուգումները հաստատում են դա: Պատգամավորի դիտարկմանն էլ, թե Ադրբեջանն արդեն իր սեփական անօդաչուներն է արտադրում, պաշտպանության նախարարը պատասխանել է. Հայաստանը՝ նույնպես, ընդ որում, ոչ թե ուրիշների գծագրերի հիման վրա, այլ սեփական տեխնոլոգիաներով:

Կարեն Կարապետյանի գլխավորած կառավարությունն այսօր մի քանի ոլորտներում մեկ տարվա գործունեության ընթացքում արձանագրված արդյունքների վերաբերյալ հակիրճ հաշվետություն է ներկայացրել: Դրա համաձայն՝ այս տարվա առաջին 7 ամիսների արդյունքներով, մասնավորապես, տնտեսական ակտիվությունն աճել է 6.2 տոկոսով, հարկային եկամուտները՝ 6 տոկոսով, արդյունաբերական արտադրանքի ծավալն աճել է 12.7 տոկոսով, արտաքին առեւտրաշրջանառությունը՝ 26 տոկոսով: Աճ է արձանագրվել նաեւ արտահանման եւ ներմուծման ծավալներում՝ 21.6 եւ 28.5 տոկոս համապատասխանաբար: Գյուղատնտեսության եւ շինարարության ոլորտներում, սակայն, ցուցանիշների նվազում է գրանցվել:

Հաշվետվության մեջ նշվում է նաեւ, որ գործադիրն ակնկալում է Համաշխարհային բանկի «Doing Business» զեկույցում 12 կետով բարելավել Հայաստանի դիրքը. ներկայում մեր երկիրը զբաղեցնում է 38-րդ հորիզոնականը: Միաժամանակ, կարծես խնդիրներ կան 2017 թվականի համար նախատեսված ներդրումային ծրագրերի հետ կապված, եթե, իհարկե, մինչեւ տարեվերջ չհաջողվի թռիչքային ցուցանիշներ արձանագրել: Կառավարության հաշվետվության համաձայն՝ 2017 թվականի առաջին 8 ամիսներին ներդրումային ծրագրերի կատարողականը կազմել է շուրջ 376 միլիոն դոլար, մինչդեռ կառավարությունը կանխատեսել էր 834 մլն դոլարի ծրագրեր. այսինքն՝ իրականացվել է նախատեսվածի 45 տոկոսը:

184 փաստաբաններ այսօր գործադուլ են հայտարարել. նրանք բողոքում են դատարաններում ապօրինի խուզարկությունների դեմ: Մինչ գործադուլի պատճառով տապալվում էր «Սասնա ծռերի» գործով դատավարությունը, փաստաբանները քննարկում էին ստեղծված իրավիճակը: Մասնակիցները կարծում են, որ եթե Փաստաբանների պալատի նախագահն ի սկզբանե խուզարկությունների վերաբերյալ դատապարտող հայտարարությամբ հանդես գար, խնդիրը չէր խորանա: Մինչդեռ քննարկմանը մասնակցած Արա Զոհրաբյանը կրկին պնդել է. զննություն է, ոչ թե խուզարկություն, իսկ եթե կան փաստաբաններ, որոնք իսկապես դա խուզարկություն են համարում, թող դիմեն իրավապահ մարմիններին կամ Պալատի խորհրդին:

Արա Զոհրաբյանին հարցեր տալու հնարավորություն է ստացել միայն փաստաբան Լուսինե Սահակյանը: Պալատի նախագահը հայտարարել է, թե չի ուզում բանավեճի վերածել այսօրվա քննարկումն ու հեռացել է դահլիճից: Նրա հեռանալուց հետո քննարկվող թեմայի մասին կարծիք է հայտնել Փաստաբանների պալատի հիմնադիր Ռուբեն Սահակյանը: Նա անդրադարձել է Արա Զոհրաբյանի եւ Կարեն Փոլադյանի համատեղ հայտարարությանը՝ նշելով, որ այն փաստաթուղթ որակելը ճիշտ չէ: Շուրջ 3 ժամ տեւած քննարկման ընթացքում խնդրի լուծման տարբեր առաջարկներ են հնչել, մասնավորապես՝ անհրաժեշտ է ստեղծել այլընտրանքային փաստաբանական միություններ, գործադուլները դարձնել հաճախակի՝ մինչեւ պատկան մարմինները կարգավորեն հարցը: Նշենք, որ փաստաբաններին սկսել են խուզարկել շուրջ 3 ամիս առաջ, երբ սկսվեցին «Սասնա ծռերի» եւ Ժիրայր Սեֆիլյանի գործով քաղաքական դատավարությունները:

«Սասնա ծռերի» գործով այսօրվա նիստին 15 պաշտպան չի ներկայացել. փաստաբանների մեծ մասը գործադուլ էր անում: Դատավոր Արտուշ Գաբրիելյանն ընթերցել է այդ մասին տեղեկացնող փաստաբանների հայտարարությունը եւ խոստացել հաջորդ նիստին անդրադառնալ նրանց վարքագծին: Նիստին ներկա են եղել միայն 3 հանրային պաշտպաններ, արդյունքում այն հետաձգվել է: Հաջորդ նիստը կկայանա սեպտեմբերի 20-ին: Նշենք, որ մինչ այդ դատական կարգադրիչները թույլ չեն տվել դահլիճ մտնել ամբաստանյալներից Սմբատ Բարսեղյանի քրոջը՝ Լուսինե Բարսեղյանին: Կարգադրիչները պարզաբանել են, որ նրա նկատմամբ  սանկցիա է կիրառվել: Լուսինե Բարսեղյանը, սակայն, իր հետ կապված որեւէ միջադեպ չի հիշում, որի արդյունքում կարող էին սանկցիա կիրառել:

Արմավիրում արտակարգ դեպք է տեղի ունեցել: Երեկ երեկոյան մարզի Արեւիկ համայնքից անգիտակից, ծայրահեղ ծանր վիճակում 13-ամյա երեխա է հիվանդանոց տեղափոխվել: Պարզվել է, որ տղան փորձել է ինքնասպանություն գործել՝ կախվելով այգու հենասյունից: Եղբայրը, սակայն, նկատել է տղային ու հասցրել է կտրել պարանը: Բժիշկները տղայի վիճակը ծանր են գնահատում, նա միացված է արհեստական շնչառության սարքին:

Apple-ը պաշտոնապես ներկայացրել է նոր սմարթֆոնները՝ iPhone 8-ը եւ iPhone 8 Plus-ը: Դրանք հասանելի են երեք գույնով՝ արծաթագույն, ոսկեգույն ու «մոխրագույն տիեզերք»: Մոդելներն ապակե կաղապար ունեն, ինչն անլար լիցքավորման հնարավորություն է տալիս: Առաջին անգամ iPhone-ում կիրառվել է TrueTone տեխնոլոգիան: Apple-ում վստահեցնում են, որ տեսագրության առումով նոր սմարթֆոնները լավագույնն են բջջային տեխնոլոգիաների պատմության մեջ: Դրանց տեսախցիկը կարող է նկարահանել վայրկյանում 60 կադր արագությամբ: Apple-ը ցուցադրել է նաեւ iPhone X-ը, որը հասանելի կլինի երկու գույնով՝ մոխրագույն եւ «մոխրագույն տիեզերք»: Նոր մոդելը վաճառքի կհանվի նոյեմբերի 3-ից:

Սեպտեմբերի 13-ին դոլարն ու ռուբլին էժանացել են, եվրոն նորից սկսել է թանկանալ: Դոլարի փոխարժեքն արդյունքում կազմել է 478 դրամ, եվրոյինը՝ 572, ռուբլունը՝ 8 դրամ 27 լումա, ֆունտինը՝ 634 դրամ:

Սեպտեմբերի 14-ին հանրապետությունում սպասվում է առանց տեղումների եղանակ: Օդի ջերմաստիճանն էապես չի փոխվի, բարձր հրդեհավտանգ իրավիճակը կպահպանվի: Երեւանում նույնպես վաղը տեղումներ չեն սպասվում: Մայրաքաղաքում գիշերը կդիտվի +17+19, ցերեկը՝ +32+34 աստիճան տաքություն:

Տպել
Կարդացեք նաև
Ամբողջ
Օրվա գլխավոր լուրերը՝ «մեկ տողով». 21.11.2017
ՀՀԿ-ն արձագանքել է ռուսական «Զվեզդա» հեռուստաալիքով հեռարձակված հաղորդմանը, որում ՀՀԿ-ի զինանշանը համեմատվում է Երրորդ ռեյխի խորհրդանիշի հետ...
Օրվա գլխավոր լուրերը՝ «մեկ տողով». 20.11.2017
«Բագրատաշեն» անցակետում վիճաբանության արդյունքում սահմանապահի են դանակահարել...
Օրվա գլխավոր լուրերը՝ «մեկ տողով». 17.11.2017
Պարտադիր զինծառայությունից խուսափած երիտասարդները քրեական հետապնդման չեն ենթարկվի, բայց ստիպված կլինեն 3 մլն 600 հազար դրամ վճարել...
Օրվա գլխավոր լուրերը՝ «մեկ տողով». 16.11.2017
Գեւորգ Սաֆարյանի ուշագնացության մասին տեղեկությունները Տիգրան Հայրապետյանը հերյուրանք է համարում. վստահեցնում է՝ Սաֆարյանին ծեծել են...
Օրվա գլխավոր լուրերը՝ «մեկ տողով». 15.11.2017
Պատգամավորներին հաջողվեց համոզել դասադուլ եւ հացադուլ հայտարարած ուսանողներին...
Օրվա գլխավոր լուրերը՝ «մեկ տողով». 14.11.2017
Հրազդանում նորածնին սպանելու գործով մեղադրանք է առաջադրվել մորը. նա ծննդաբերությունից հետո երեխային երկար ժամանակ զուգարանակոնքի մեջ է թողել...
Ամենաշատ
Partner news