Հայաստանն այն երկրներից է, որը համապատասխանում է ֆիսկալ թափանցիկության նվազագույն պահանջներին: Այս մասին նշված է ԱՄՆ Պետքարտուղարության «Ֆիսկալ թափանցիկություն 2017» զեկույցում:
Զեկույցի համաձայն՝ ֆինանսական թափանցիկությանը ներկայացվող նվազագուն պահանջները ներառում են բյուջետային առանցքային փաստաթղթերի առկայություն, որոնք համընդհանուր հասանելի են եւ ընդհանուր առմամբ հուսալի են:
Զեկույցում նշվում է, որ կառավարությունների ֆինանսական թափանցիկության ամենամյա հաշվետվությունները, որոնք ԱՄՆ օգնությունն են ստանում, օգնում են ապահովել հարկատուների միջոցների ճիշտ օգտագործումը եւ հնարավորություն են ստեղծում կառավարության հետ բյուջեի թափանցիկության հարցի կարեւորության մասին երկխոսության համար:
Բյուջեի փաստաթղթավորման թափանցիկությունից բացի, նվազագույն պահանջ է համարվում նաեւ բնական պաշարների արդյունահանման վերաբերյալ պետական պայմանագրերի եւ լիցենզիաների ընդհանուր հասանելիությունը:
Զեկույցի համաձայն՝ Ադրբեջանը չի համապատասխանում բյուջեի թափանցիկության նվազագույն պահանջներին: Ավելին՝ նշվում է, որ Ադրբեջանն այս ոլորտում զգալի առաջընթացի չի հասել:
