Հայաստանի գյուղացիներին կներվեն պարարտանյութի եւ սերմերի պարտքերը, սակայն միայն մեկ անգամ: Այս մասին կառավարության սեպտեմբերի 14-ի նիստում ասաց վարչապետ Կարեն Կարապետյանը:
2012 թվականից գյուղացիներին արտոնյալ գներով տրամադրվում են պարարտանյութեր, սերմեր եւ դիզելային վառելիք: Սակայն ոչ բոլորն են կանոնավոր վճարում պատվիրածի դիմաց: 2012-2016 թվականների համար մեծ թվով պարտքեր են կուտակվել, չնայած 2017-ի համար ոչ մի պարտք չկա: «Մայիսին մենք Տարածքային կառավարման եւ զարգացման նախարարությանը հանձնարարել էինք ցուցակներ կազմել ըստ գյուղերի՝ ով եւ որքան է պարտք: Մարզպետներին դարձյալ հանձնարարում եմ մեկամսյա ժամկետում կազմել պարտառուների ցուցակները եւ ներկայացնել Տարածքային կառավարման եւ զարգացման նախարարություն: Դրանից հետո Գյուղատնտեսության նախարարությունը մեկ շաբաթում արդյունքները կամփոփի եւ առաջարկներ կներկայացնի՝ պարտքերը դուրս գրելու մասին: Սակայն մենք սա միայն մեկ անգամ կանենք, իսկ այնուհետեւ վճարումներին շատ խիստ կհետեւենք»,- նշեց վարչապետը: