«Սասնա ծռեր» խմբի 18 անդամի գործով դատական նիստին այսօր՝ սեպտեմբերի 14-ին, դատավոր Արտուշ Գաբրիելյանը վերացրեց մի քանի ամբաստանյալի՝ ընտանիքի անդամների հետ տեսակցությունների արգելանքը:
Երեւանի Ավան եւ Նոր Նորք վարչական շրջանների ընդհանուր իրավասության դատարանում Արտուշ Գաբրիելյանը, բավարարելով ներկա պաշտպանների՝ ավելի վաղ արված միջնորդությունները, թույլատրեց մի քանի ամբաստանյալներին տեսակցել իրենց ընտանիքների եւ մերձավոր ազգականների հետ, ինչպես նաեւ վերացրեց հեռախոսային խոսակցությունների արգելանքը: Նշենք, որ մեղադրողը բոլոր միջնորդություններին առարկեց:
Մինչեւ մի քանի ամբաստանյալների վերաբերյալ որոշում կայացնելը՝ Արտուշ Գաբրիելյանը դատական սանկցիաներ կիրառեց պաշտպաններ Լուսինե Սահակյանի եւ Մուշեղ Շուշանյանի նկատմամբ: Հիշեցնենք, որ այսօր եւս դատական կարգադրիչները փորձեցին խուզարկել պաշտպաններին, իսկ մերժումից հետո արգելեցին մուտք գործել դատարանի շենք:
