Եվրամիությունն առաջնորդվում է Մարդու իրավունքների եվրոպական դատարանի դիրքորոշմամբ, եւ այդ դիրքորոշման համաձայն՝ Հայաստանում չկան մարդիկ, որոնք որպես քաղբանտարկյալներ են բնութագրվում։ Այս մասին սեպտեմբերի 14-ին հայտարարել է Հայաստանում Եվրամիության պատվիրակության ղեկավար Պյոտր Սվիտալսկին՝ «Հայաստանի մարզերում եվրոպական ակումբների» էսսեների մրցանակաբաշխության արարողության ժամանակ։
Ի պատասխան հարցին՝ արդյոք Հայաստանում քաղբանտարկյալներ կա՞ն, ինչպես պնդում են մի շարք հասարակական կազմակերպություններ եւ ընդդիմությունը, դեսպանը նշեց․ «Մենք քննարկում ենք այդ մարդկանց ընկալումները, մենք հարցումներ ենք անցկացնում։ Ես գնահատում եմ հանգամանքը, որ այդ թեման քննարկելու ցանկության պարագայում կարող եմ դա հանգիստ անել իրավապաշտպանների, օրենսդիր մարմինների ներկայացուցիչների հետ։ Նրանք պատրաստ են ինձ հետ հանդիպում կազմակերպել։ Հնարավոր է՝ մենք եւ պետական մարմինները ՀԿ-ների կարծիքը չենք կիսում։ Նման դեպքերում մենք առաջնորդվում ենք ՄԻԵԴ-ի դիրքորոշմամբ եւ այդ դիրքորոշման համաձայն՝ Հայաստանում չկան մարդիկ, որոնք որպես քաղբանտարկյալ են բնորոշվում։ Մենք հասկանում ենք, որ գոյություն ունեն քաղաքականացված, երբեմն էլ չքաղաքականացված հարցեր։ Ես իշխանությունների հետ մշտապես երկխոսության մեջ եմ, եւ մենք՝ որպես ԵՄ, չենք ստիպում, բայց մենք սեփական կարծիքը ներկայացնելու իրավունք ունենք»,-ասել է Պյոտր Սվիտալսկին։
