Եվրամիությունը հետեւում է Հայաստանի՝ ԵՏՄ կազմից դուրս գալու վերաբերյալ քննարկումներին։ Այս մասին սեպտեմբերի 14-ին հայտարարել է Հայաստանում ԵՄ պատվիրակության ղեկավար Պյոտր Սվիտալսկին՝«Հայաստանի մարզերում եվրոպական ակումբների» էսսեների մրցանակաբաշխության արարողության ժամանակ։
Պատասխանելով հարցին՝ ինչպե՞ս է ինքը վերաբերում Հայաստանի՝ ԵՏՄ-ից դուրս գալու քննարկումներին եւ արդյոք դա երկիրը չի՞ մոտեցնում ԵՄ-ին, դեսպանն ասաց․ «Ես ուրախ եմ, որ մոտենում ենք այն պահին, երբ ՀՀ-ԵՄ համաձայնագիրը պետք է ստորագրենք։ Այն լիովին համադրելի է Հայաստանի ստանձնած այլ պարտավորվածությունների հետ։ Սա մեր մեկնարկային կետն է։ Մնացած ամեն ինչ միայն հայերին է վերաբերում. նրանք պետք է որոշեն, թե ինչն է իրենց համար լավ»։
Սվիտալսկու խոսքով՝ վերջերս ինքը մի շարք բարձրաստիճան հանդիպումների է մասնակցել, որոնք շատ կառուցողական մթնոլորտում են անցել։ «Այդ խորհրդակցությունների ժամանակ ես ոչ մի անհամաձայնություն չեմ տեսել։ Դա ապագայի համար շատ լավ նշան է։ Մեր առաջնահերթությունը երկկողմանի համակարգի շուրջ կենտրոնանալն է։ Հայաստանն ազատ երկիր է եւ իր խոսքն ասելու իրավունք ունի»,-հավելեց Պյոտր Սվիտալսկին։
Հիշեցնենք․ «Ելք» դաշինքը Հայաստանի՝ ԵՏՄ կազմից դուրս գալու նախաձեռնությամբ է հանդես եկել։