Ահաբեկչական խմբավորումը, որը կանգնած էր Իսպանիայում օգոստոսին տեղի ունեցած հարձակումների ետեւում, մտադիր էր ահաբեկչություններում ավելի քան 100 կգ պայթուցիկ գործածել, հայտնում է Periodico-ն։
Թերթը գրում է, որ կասկածյալներից մեկը, Մոհամեդ Խուլի Չեմլալը, խոստովանել է, որ ահաբեկչական բջիջը 100 կգ պայթուցիկ է պատրաստել Ալկանարում գտնվող տանը։ Չեմլալը հայտնել է, որ ահաբեկիչները մտադիր էին այդ պայթուցիկը 20 քսակների մեջ տեղավորել՝ յուրաքանչյուրում 5-ական կգ, բեռնել դրանցով երեք բեռնատարներ, այնուհետեւ հարձակումներ իրականացնել Բարսելոնում, բայց պայթուցիկի պատրաստման վերջին փուլում այդ տանը պայթյուն էր տեղի ունեցել։ Ահաբեկիչների թիրախներից մեկն էլ Սագրադա Ֆամիլիա հանրահայտ տաճարը պետք է լիներ։
Իրավապահների տվյալներով այդ խմբավորումը 12 անդամ ուներ։ Նրանցից 4-ը կալանավորված է, հինգը ոչնչացվել է Քամբրիլսում տեղի ունեցած ահաբեկչությունից հետո։ Եւս երկուսը, այդ թվում ահաբեկչությունների գլխավոր կազմակերպիչ իմամ Աբդելբաքի էս Սաթին, զոհվել էին հարձակումների նախօրեին, Ալկանարում գտնվող տանը տեղի ունեցած պայթյունի հետեւանքով։ Բարսելոնում մարդկանց բազմությանը վրաերթի ենթարկած ֆուրգոնի վարորդը, 22-ամյա մարոկացի Յունես Աբույակուբը, ոչնչացվել է օգոստոսի 21-ին հատուկ գործողության ընթացքում։
Պաշտոնական տվյալներով՝ Բարսելոնում ու Քամբրիլսում տեղի ունեցած ահաբեկչությունների հետեւանքով զոհվել էր 15, տուժել 130 մարդ։