ՀՀԿ-ն Հայաստանի եւ Ադրբեջանի ԱԳ նախարարների առաջիկա հանդիպումից շրջադարձային ակնկալիքներ չունի։ Այդ մասին այսօր՝ սեպտեմբերի 14-ին ՀՀԿ Գործադիր մարմնի նիստից հետո լրագրողներին ասել է ԱԺ փոխնախագահ Էդուարդ Շարմազանովը։
«Նալբանդյան-Մամեդյարով հանդիպումից էական ակնկալիքներ չունենք, որովհետեւ Ադբեջանը իրականացնում է հակահայկական քաղաքականություն, քաղաքականություն, որը չի բխում բանակցային գործընթացի տրամաբանությունից»,- ասել է Շարմազանովը։
Նրա խոսքով, վերջերս Ադրբեջանի նախագահը կրկին խոսեց ոչ քաղաքական լեքսիկոնով, ստեր տարածեց, հայտարարեց, թե Արցախը իրենց պատմական հողն է։ «Պատմական հող ունենալու համար նախ պետք է պատմություն ունենալ»,- ասել է Շարմազանովը եւ հիշել Դոստոեւսկուն, որը իր «Ապուշը» գրել էր հիսուն տարի ավելի շուտ, քան Ադրբեջան պետության ստեղծումը։
