90-ական թվականներին Երեւանում ոստիկանությունն ամենեւին էլ ավելի լավ չէր աշխատում: Սեպտեմբերի 15-ին ԱԺ-ում կայացած ավանդական ճեպազրույցների ժամանակ այս մասին ասաց Դաշնակցություն խմբակցության ղեկավար Արմեն Ռուստամյանը՝ պատասխանելով Երեւանի կենտրոնում երեկ տեղի ունեցած կրակոցների վերաբերյալ հարցին:
Նրա խոսքով՝ մեղավորները պետք է պատասխան տան օրենքին համաձայն: Մեղքի իրենց բաժինն ունեն թե՛ պետական մարմինները, թե՛ ոստիկանապետ Վլադիմիր Գասպարյանը: Այդուհանդերձ, քննություն է կատարվում, եւ անհրաժեշտ է դրա արդյունքներին սպասել: Ռուստամյանը համամիտ չէ այն կարծիքներին, որ 90-ական թվականներին ՆԳ նախարար Վանո Սիրադեղյանի խիստ ձեռքի պայմաններում նման բան տեղի չէր ունենա. «Պարոն Գասպարյանն իր չափով պիտի իր պատասխանատվությունն ունենա։ Իսկ ես չեմ երազում Վանոյի վերադարձը։ Որովհետև էնպես չէ, որ էն ժամանակ չէին սպանում։ Եթե Վանոն վերադառնա, նույնն է լինելու։ Այդ ժամանակ էլ էին լինում թե՛ կրակոցներ, թե՛ սպանություններ»,- մխիթարեց իշխող կոալիցիայի մեջ մտնող կուսակցության ներկայացուցիչը: