Ժիրայր Սեֆիլյանի եւ մյուսների գործով դատական նիստին այսօր՝ սեպտեմբերի 15-ին, գործով մեղադրյալ Սմբատ Գալոյանը իր ցուցմունքում մանրամասներ է պատմել։ Նշենք, որ Սմբատ Գալոյանը պայմանագրային զինծառայող է եղել, բանակային 5-րդ կորպուսում է ծառայել եւ պարգեւատրվել է որպես լավագույն դիպուկահար։

Նա ասել է, որ Ժիրայր Սեֆիլյանին անձնապես չի ճանաչել, նրա հետ շփվել է գործով մեղադրյալ Հովհաննես Պետրոսյանի միջոցով։ Սեֆիլյանի ծրագրերի մասին տեղեկացել է Պետրոսյանից։ Ըստ Սմբատ Գալոյանի՝ Սեֆիլյանը ծրագրել էր հեղաշրջում իրականացնել, որ շրջանակում նախ պետք է գրավեին Նուբարաշենի զորամասը։

Մեղադրյալը պնդել է, որ ամբողջ ընթացքում իրեն վստահեցրել են, որ անարյուն հեղաշրջում է լինելու։ Պաշտպանի հարցին, թե եթե անձամբ չի ճանաչել, ինչո՞ւ է համոզված, որ Սեֆիլյանն է նման հեղաշրջում ծրագրել, վկան հավաստիացրել է, թե Պետրոսյանից է իմացել։ Մեղադրյալը ասել է, որ ինքը ներգրավված էր մի խմբում, որի անդամներն էին Ներսես Պողոսյանը, Հովհաննես Պետրոսյանը։ Մեղադրյալը վստահեցրել է, որ հրաման են ստացել Նուբարաշենի զորամաս մտնել, բայց հրաժարվել են եւ զենքերը վերադարձրել։ «Մենք նույնիսկ փամփուշտները եռացրել էինք, որ եթե գնայինք Նուբարաշեն, ապա կրակելուց դրանք չպայթեին ու զինվորները չտուժեին»,- ասել է մեղադրյալը։ Նա քանիցս շեշտել է, որ իրեն մշտապես վստահեցրել են, որ այդ գործողությունների ժամանակ պետք է արյուն չթափվեր։