Երեւանում սեպտեմբերի 14-ին տեղի ունեցած սպանությունը բացահայտվել է: Հանցագործության մեջ երեք անձ է կասկածվում, նրանց ինքնությունը հայտնի է. 60-ամյա Ռաֆիկ Խաչատրյան, 35-ամյա Ալբերտ Բլբուլյան եւ 33-ամյա Արմեն Կարադամիդով: Ոստիկանությունը հաստատել է լուրը՝ նշելով, սակայն, որ կասկածյալներին դեռ չեն հայտնաբերել: Հիշեցնենք, որ Վերնիսաժի մոտ երեկ տեղի ունեցած միջադեպի հետեւանքով սպանվել է 43-ամյա Գարիկ Մոսինյանը, իսկ նրա ընկերը՝ 39-ամյա Վահագն Աբգարյանը, վիրավորվել: Երկուսն էլ Ալավերդիից են, քրեական աշխարհի ներկայացուցիչներ: Աբգարյանին վիրահատել են, նրա կյանքին վտանգ չի սպառնում:
Քննչական կոմիտեն նաեւ դեպքի որոշ մանրամասներ է հայտնել: Պարզվել է, որ սպանությունը նախապես ծրագրված է եղել, կասկածյալներից երկուսը նույնպես Ալավերդիից են, մեկը՝ Երեւանից: Նրանք մեքենա են վարձակալել եւ վաղ առավոտից զինված դարանակալել են հյուրանոցի դիմաց, որտեղ գտնվել են միջադեպի զոհն ու վիրավորը: Հյուրանոցից դուրս գալիս էլ կրակել են նրանց ուղղությամբ:
Երեւանում երեկ տեղի ունեցած սպանությանն այսօր անդրադարձ է եղել նաեւ Ազգային ժողովի աշնանային նստաշրջանի առաջին ճեպազրույցների ժամանակ: Դաշնակցական Արմեն Ռուստամյանի կարծիքով՝ կատարվածում մեղքի իրենց բաժինն ունեն թե՛ պետական մարմինները, թե՛ ոստիկանապետ Վլադիմիր Գասպարյանը: Այդուհանդերձ, քննություն է կատարվում, եւ Ռուստամյանը հորդորում է սպասել արդյունքներին: «Ելք»-ից Նիկոլ Փաշինյանն էլ կատարվածը խայտառակ իրադարձություն է որակել եւ համոզմունք հայտնել, որ սա ներհանրապետական «ռազբորկա» է եւ կապ ունի Ալավերդիում նոյեմբերին կայանալիք քաղաքապետի ընտրությունների հետ:
Ժիրայր Սեֆիլյանի եւ մյուսների գործով այսօրվա դատական նիստում մեղադրյալ Սմբատ Գալոյանը որոշ մանրամասներ է պատմել: Նա, ի դեպ, պայմանագրային զինծառայող է եղել ու պարգեւատրվել է որպես լավագույն դիպուկահար: Գալոյանն ասել է, որ Սեֆիլյանին անձամբ չի ճանաչել, նրա հետ շփվել ու ծրագրերի մասին իմացել է մյուս մեղադրյալի՝ Հովհաննես Պետրոսյանի միջոցով: Նա պնդել է, որ Սեֆիլյանը ծրագրել էր հեղաշրջում իրականացնել, ինչի համար նախ պետք է գրավեին Նուբարաշենի զորամասը, բայց երբ այն գրավելու հրաման են ստացել, հրաժարվել են եւ վերադարձրել զենքերը: Պաշտպանի հարցին, թե եթե անձամբ չի ճանաչել, ինչո՞ւ է համոզված, որ Սեֆիլյանն է հեղաշրջում ծրագրել, վկան ասել է, թե Պետրոսյանից է իմացել: Նշենք, որ վերջին մի քանի դատական նիստերին դահլիճում տեսանկարահանումներ կատարել չի թույլատրվում:
Իսկ դատարանի բակում փոքրիկ միջադեպ է տեղի ունեցել: Սեֆիլյանի կողմնակիցներն այսօր դատական նիստի էին եկել գործով դատավոր Տաթեւիկ Գրիգորյանի խամաճիկով: Նրանց, սակայն, այդպես էլ չի հաջողվել այն դատարանի շենք տանել:
Երեւանում մեկնարկել է 18-ամյա Վահե Մուրադյանի աղմկահարույց սպանության գործով դատավարությունը: Երեւանի պետհամալսարանի ուսանողին սպանելու մեջ մեղադրվում է կուրսընկեր Կարեն Չատիկյանը: Սպանվածի հարազատները նրան դատարանում սուլոցներով եւ վիրավորական արտահայտություններով են դիմավորել: Առաջին նիստին հարցաքննվել է Մուրադյանի մտերիմ ընկեր Ռաֆիկ Մարտիրոսյանը, որը նույնպես դեպքի օրը դանակահարվել էր: Նա պատմել է, որ Կարեն Չատիկյանն իրենց հանդիպման էր կանչել՝ պարզելու, թե ինքն ում է «դոդիկ» անվանել: Վկան մի քանի անգամ դատարանում հայտարարել է, որ ոչ ոքի վիրավորելու մտադրություն չի ունեցել, «դոդիկ» էլ լավ իմաստով է ասել, բայց Կարեն Չատիկյանին այդպես էլ համոզել չի կարողացել. սկսված քաշքշուքը ողբերգությամբ է ավարտվել: Հաջորդ նիստին հարցաքննվելու են Չատիկյանի ու Մուրադյանի ընկերները:
Լոնդոնի մետրոյի Փարսոնս Գրին կայարանում պայթյուն է որոտացել: Միջադեպի հետեւանքով 22 մարդ հիվանդանոց է տեղափոխվել, նրանցից մեկի վիճակը ծանր է: Մետրոյում եւ կայարանից դուրս խուճապային իրավիճակ է ստեղծվել: Մետրոյի վագոնում տոպրակով դույլ է եղել, որում եղած փաթեթն էլ պայթել է: Ոստիկանության հաղորդմամբ՝ պայթուցիկ սարքը մասամբ է պայթել: Միջադեպն արդեն ահաբեկչություն է որակվել: Հետաքննությամբ զբաղվում է Սքոթլենդ Յարդի հակաահաբեկչական ստորաբաժանումը: Բրիտանական մայրաքաղաքի մետրոյի մի քանի կայարաններում երթեւեկությունը դադարեցվել է:
Սեպտեմբերի 15-ին դոլարը կայուն է եղել, բրիտանական ֆունտը կտրուկ թանկացել է: Դոլարի փոխարժեքն արդյունքում կազմել է 478 դրամ, ֆունտինը՝ 649, եվրոյինը՝ 571, ռուբլունը՝ 8 դրամ 31 լումա:
Սեպտեմբերի 16-ի երեկոյան ժամերին հանրապետությունում սպասվում է կարճատեւ անձրեւ եւ ամպրոպ: Սեպտեմբերի 17-ից օդի ջերմաստիճանը 2-3 աստիճանով կնվազի, 19-ից՝ 1-2 աստիճանով կբարձրանա: Երեւանում վաղը տեղումներ չեն սպասվում: Մայրաքաղաքում գիշերը կդիտվի +18+20, ցերեկը՝ +33+35 աստիճան տաքություն: