Հայաստանում առաջին գրանցված բանկը` Պրոմեթեյ բանկը, հոկտեմբերի 1-ից հանդես կգա Evocabank ապրանքանիշով: Այդ մասին լրագրողներին հայտնեց բանկի վարչության նախագահի տեղակալ Կարեն Եղիազարյանը (ֆոտոռեպորտաժ):
Անվան փոփոխությունը դեռ սկիզբն է. փոխվում է նաև բանկի ռազմավարությունը: Այսուհետ բանկը կաշխատի mobile first տարբերակով: Յուրաքանչյուր նոր ծառայություն նախեւառաջ հարմարեցված կլինի մոբայլ տարբերակով օգտագործման համար։
Բանկն արդեն պատրաստել է EvocaTouch հավելվածը, որը ևս հասանելի կդառնա հոկտեմբերի 1-ից:
«Ակնհայտ է, որ այսօր հաճախորդների մեծ մասն ավելի շատ ժամանակ է անցկացնում ինտերնետում, քան 10 կամ նույնիսկ 2-3 տարի առաջ: Հաճախորդների հետեւից դեպի օնլայն ձեւաչափ են գնում խանութները, առաքման ծառայությունները, տաքսի ծառայությունները: Բացառություն չեն կազմի նաեւ բանկերը», - համոզված է Կարեն Եղիազարյանը:
EvocaTouch-ը նախատեսված կլինի թե ֆիզիկական, թե իրավաբանական անձանց համար:
«Նոր անունն ու գույները կարտահայտեն բանկի նոր ուղղությունը»,-հավելեց բանկի մարքետինգի եւ հասարակայնության հետ կապերի բաժնի պետ Տաթեւիկ Խաչատրյանը: Evoca անունը կապված է էվոլյուցիայի հետ, ինչպես նաեւ անգլերեն evoke բառի հետ, որի իմաստն է` արթնացնել:
Նոր տարբերանշանի գույներն են մոխրագույնն ու վառ մանուշակագույնը: Մոխրագույնն արտահայտում է նորագույն տեխնոլոգիաները, իսկ մանուշակագույնը` երիտասադության, նորարարության գույնը:
Բանկը հաճախորդների համար պատրաստել է անակնկալ: Այն հաճախորդները, ովքեր հոկտեմբերի 1-31-ը կբեռնեն EvocaTouch-ը App Store-ից կամ Google Play-ից ու դրանով կպատվիրեն Visa կամ Master քարտ, կմասնակցեն 75 փաթեթների խաղարկությանը: Հաջողակները կուղեւորվեն Դուբայ, որտեղ կայցելեն բոլոր տեսարժան վայրերն ու կմասնակցեն Ջենիֆեր Լոպեսի համերգին` VIP տոմսերով: Ընդ որում, բոլոր ուղեգրերը նախատեսված կլինեն երկու հոգու համար, այնպես որ յուրաքանչյուրը կկարողանա որոշել` ում հետ գնալ ուղեւորության: