Դուբայի իշխանությունները գործարկել են աշխարհի խոշորագույն արևային էլեկտրակայանի նախագիծը, հայտնում է The National պարբերականը։

Պարբերականի տվյալներով՝ նոր էլեկտրակայանի հզորությունը կկազմի 700 ՄՎտ, իսկ արևային կոլեկտորի բարձրությունը՝ 260 մ։ Նշում են, որ դա աշխարհի ամենաբարձր նման կառույցն է այսօրվա դրությամբ։

Էլեկտրակայանի շինարարության համար հայտարարված տենդերում հաղթել է Սաուդյան Արաբիայից ու Չինաստանից կապալառուների կոնսորցիումը։ Նախագծի արժեքը, նախնական գնահատականներով, կարող է գերազանցել 3․9 մլրդ դոլարը։ Դուբայի իշխանությունների ծրագրերով, էլեկտրականության արտադրության մեջ  էներգիայի մաքուր աղբյուրների մասնաբաժինը մինչև 2020թ․ պետք է հասնի 25 տոկոսի , իսկ մինչև 2050թ․՝ 75 տոկոսի։