Աշգաբադից Մոսկվա ժամանած հայից «Դոմոդեդովոյի» մաքսատան աշխատակիցներն առգրավել են 1,6 մլն ռուբլի ընդհանուր արժեքով ոսկերչական իրերի խմբաքանակ, հայտնում է Lenta-ն՝ վկայակոչելով գերատեսչության մամուլի ծառայությանը:
Հայաստանի 36-ամյա քաղաքացին անցել էր «կանաչ միջանցքով»: Սակայն նրա ձեռքի ուղեբեռը ստուգելիս տեսուչը ոսկերչական 9 իր է հայտնաբերել՝ մատանիներ, ականջօղեր, կախազարդեր, ապարանջան եւ շղթաներ: Տղամարդը պարզաբանել է, որ զարդեղենը ձեռք է բերել կնոջը նվիրելու համար եւ հայտնել է զարդեղենի մոտավոր գինը՝ 6 հազար դոլար, սակայն չի կարողացել ներկայացնել արժեքը հաստատող անդորրագրեր:
Փորձաքննությամբ հաստատվել է, որ զարդերը պատրաստված են 585 հարգի ոսկուց՝ ադամանդների ագուցմամբ: Մասնագետներն արժեքը ավելի բարձր են գնահատել, քան ուղեւորն է հայտնել՝ 1,6 մլն ռուբլի:
«Օրենսդրությունը չխախտելու համար տղամարդը զարդեղենը պետք է հայտարարգրեր եւ անցներ «կարմիր միջանցքով»: Անձնական օգտագործման համար 10 հազար եվրո արժեքից ավելի ապրանք տանելու դեպքում ուղեւորը պետք է մաքսատուրք վճարի: Դա կազմում է 10 հազար եվրոն գերազանցող իրի արժեքի 30 տոկոսը»,- նշել են մաքսատանը:
Զարդեղենի ապօրինի տեղափոխման համար քաղաքացուն տուգանք է սպառնում՝ նախատեսված ՌԴ Վարչական իրավախախտումների օրենսգրքի 16.2 հոդվածով («Ապրանքի չհայտարարագրում կամ ոչ հավաստի հայտարարագում»):