Հայատյացության հարցում Ադրբեջանը «կարմիր գիծն» անցնում է: Այս մասին սեպտեմբերի 18-ին հայտարարեց Լեռնային Ղարաբաղի օմբուդսմեն Ռուբեն Մելիքյանը՝ ելույթ ունենալով Հայաստան-Սփյուռք 6-րդ համաժողովի շրջանակում «Լեռնային Ղարաբաղի խնդրի կարգավորման գործընթաց» հարթակում:
Նրա խոսքով՝ շատ շուտով Լեռնային Ղարաբաղի օմբուդսմենի գրասենյակը հերթական զեկույցը կհրապարակի, որը վերաբերում է Ադրբեջանում հայատյացությանը: Ռուբեն Մելիքյանը հայտնեց, որ ԼՂՀ ՄԻՊ գրասենյակը շարունակում է ադրբեջանական սոցցանցերում մոնիթորինգը եւ նոր փաստեր է ներկայացնում: «Փետրվարին համացանցում հայտնված նյութերից ակնհայտ է, որ դիրքերից մեկում ադրբեջանցիները խոսում են ցեղասպանության մասին: Նրանք 2 անգամ հայտարարում են, որ հայերին ցեղասպանություն ցույց կտան: Հայատյացությունը ակադեմիական երեւույթ չէ, դա խոսքի ազատության դրսեւորում չէ, հայատյացությունն այս մարդկանց մոտ ցեղասպանության մոտիվացիա է ստեղծել»,- ընդգծեց Մելիքյանը:
Նրա գնահատմամբ՝ հայատյացությունը տարբեր մակարդակներում է դրսեւորվում: «Ադրբեջանը շահարկեց մի քանի ամիս առաջ երեխայի եւ տատիկի սպանությունը: Ցանկանում եմ նշել, որ Ադրբեջանը ոչ մի հայտարարություն չի կատարել մեր զոհված Վաղարշակի կապակցությամբ (աշակերտը զոհվել էր ապրիլի 2-ին սանձազերծված ադրբեջանական ագրեսիայի ժամանակ – խմբ.): Մենք մեր տրամադրության տակ եղած լուսանկարները չենք հրապարակել՝ հաշի առնելով, որ Վաղարշակն ազգականներ ունի, իսկ Ադրբեջանը տարածել է դատաբժշկական փորձաքննության լուսանկարները»,- հավելեց օմբուդսմենը:
Անդրադառնալով Լեռնային Ղարաբաղը մեկուսացնելու Ադրբեջանի փորձերին՝ նա նշեց, որ «սեւ ցուցակների» եւ քրեական հետապնդումների միջոցով Բաքուն փորձում է սահմանափակել Լեռնային Ղարաբաղ այցելությունները: «Իմ ադրբեջանցի գործընկերը հայտարարում է, որ Ռամիլ Սաֆարովը, բոլորս գիտենք՝ ով է նա, երկրու պետք է օրինակ ծառայի»,- նշեց Ռուբեն Մելիքյանը:
Հիշեցնենք, որ ադրբեջանցի զինծառայող Ռամիլ Սաֆարովը 2005 թվականին Բուդապեշտում կացնահարել էր քնած հայ սպա Գուրգեն Մարգարյանին, որը մասնակցում էր ՆԱՏՕ-ի սեմինարին:
