Իրաքի դաշնային դատարանը որոշում է կայացրել դադարեցնել Իրաքյան Քուրդիստանում հանրաքվեի անցկացումը։ Նշենք, որ այն անցկացնելու համար դատարան էր դիմել վարչապետ Հեյդար ալ Աբադին։ ՏԱՍՍ-ը հաղորդում է, որ պաշտոնական դիմումի տեքստը ներկայացրել է վարչապետի մամուլի ծառայությունը։ Տեքստում նշվում է, որ Իրաքի վարչապետը սպասվելիք քվեարկությունից առաջ դատարան էր դիմել «Իրաքի ցանկացած շրջանի կամ նահանգի առանձնացումը ոչ սահմանադրական ճանաչելու» հայցը քննարկելու համար։
Մամուլի ծառայությունը հաղորդում է, որ այդ կապակցությամբ տրվել է մանդատ, որը դադարեցնում է քրդական շրջանի անջատման մասին հանրաքվեի անցկացումը։
Ավելի վաղ դատարանի մամուլի ծառայությունից հայտնել էին, որ որոշվել է ոչ սահմանադրական ճանաչել քրդական ղեկավարության պլանները և դադարեցնել քվեարկության անցկացումը։
Իրաքյան Քուրդիստանը Քրդական ինքնավար շրջանի ոչ պաշտոնական անվանումն է, որը Իրաքի կազմում լայն ինքնավարության կարգավիճակ ունի՝ իրավաբանորեն ամրագրված երկրի սահմանադրության մեջ։
Խորհրդարանն ուրբաթ իր առաջին նիստի ժամանակ հավանության էր արժանացրել հանրաքվեի անցկացումը։ Բաղդադը, սակայն, անօրինական է համարում քրդական իշխանությունների որոշումը։ Իրաքի վարչապետը ավելի վաղ չէր բացառել ռազմական միջամտությունն այն դեպքում, եթե հանրաքվեն հանգեցնի բռնության տարածմանը, ընդգծելով նաև, որ չի հրաժարվի Էրբիլի հետ բանակցություններից։
