Հայաստանը շատ է հետաքրքրում լիբանանցի զբոսաշրջիկներին, հատկապես քրիստոնյա արաբներին: Սեպտեմբերի 18-ին Երեւանում ընթացող Հայաստան-Սփյուռք հերթական համաժողովի շրջանակում լրագրողների հետ հանդիպման ժամանակ այս մասին ասաց Լիբանանի տուրիզմի նախարար Ավետիս Կիտանյանը:
Նրա խոսքով՝ Երեւան-Բեյրութ չվերթներով օդանավերը լեցուն են գրեթե 90 տոկոսով, ըստ որում՝ Հայաստան են ձգտում գալ ամենեւին էլ ոչ միայն լիբանանցի հայերը, այլ նաեւ արաբները, առաջին հերթին՝ քրիստոնյաները: «Նրանց համար առանձնահատուկ հետաքրքրություն է ներկայացնում Հայաստանի քրիստոնեական ժառանգությունը: Աճում է նաեւ Հայաստանից Լիբանան մեկնող զբոսաշրջիկների թիվը: 2012 թվականին նրանց թիվը 1350 էր, իսկ 2017 թվականի առաջին 8 ամիսներին՝ արդեն մոտ 10 հազար: Դժվարանում եմ ասել, թե որքան զբոսաշրջիկ է Հայաստան ժամանում: Սակայն հնարավոր է նրանց գրավել: Այստեղ ե՛ւ ձմեռային տուրիզմ կա, ե՛ւ բժշկական: Ճիշտ է, վերջինի հարցում մի փոքր դժվարություններ կան, որովհետեւ արտասահմանյան երկրներում, մասնավորապես արաբական երկրներում քիչ են տեղեկացված ինչպիսի բժշկական կենտրոններ կան եւ ինչ կարող են առաջարկել: Այս հարցում աշխատանքի կարիք կա, որովհետեւ որակյալ բժշկությունը բոլոր արաբական երկրներում չէ, որ հասանելի է: Հայկական գնի եւ որակի հարաբերակցությունը կարող է նրանց սաստիկ գրավել»,- նշեց Կիտանյանը: