Ոչ մի միջազգային կառույց  չի ճանաչում Իրաքյան Քուրդիստանում անկացվելիք հանրաքվեի արդյունքները։  News.am-ի թղթակցի հետ զրույցում  այսպիսի կարծիք է հայտնել Մերձավոր Արևելքի ինստիտուտի նախագահ Եվգենի Սատանովսկին։

Նրա կարծիքով Քուրդիստանի հանրաքվեն ոչ այլ ինչ է, քան Իրաքի կառավարության վրա ճնշում գործադրելու փորձ։  «Դրանք բյուջեի, նավթային տարանցման և այլ հարցերի մասին առևտրի փորձեր են։ Ինչպես նաև փորձ է արվում որևէ կերպ միավորելու քրդական կուսակցությունները»,-ասել է փորձագետը՝ հավելելով, որ դեռ հասկանալի չէ,թե  ով է իսկապես պատրաստ աջակցել հանրաքվեին, անգամ հենց Իրաքյան Քուրդիստանում, քանի որ դրա անցկացման հարցը չի քննվել և հավանության չի արժանացել  խորհրդարանի կողմից։

Սատանովսկին հիշեցրել է, որ մի շարք երկրների ղեկավարներ, ինչպիսիք են Սիրիան, Իրանը, Թուրքիան, Իրաքը, ԱՄՆ-ն և Ռուսաստանը, իրենց դժգոհությունն են արտահայտել հանրաքվեի անցկացման վերաբերյալ։  Փորձագետի կարծիքով այսպիսով՝ հանրաքվեն տարածաշրջանում ոչ մի դրական կամ բացասական ազդեցություն չի ունենա։ 

«Ես չգիտեմ՝ կհրաժարվե՞ն նրանք հանրաքվեից, թե՞ ոչ։ Գիտեմ միայն, որ հանրաքվեն որևէ հետևանք չի ունենա»,-ընդգծել է Սատանովսկին՝ հավելելով, որ ներկայումս Քուրդիստանն ունի իր բյուջեն, իր նավթային պաշարները, որոնք նա վաճառում է՝ մաքսանենգ ճանապարհով արտահանելով Թուրքիա կամ Բաղդադի միջոցով հանելով  միջազգային շուկա։

Հիշեցնենք, որ ինքնավար Իրաքյան Քուրդիստանի իշխանությունները Իրաքից անջատվելու նպատակով հանրաքվեի անցկացման օր են նշանակել են սեպտեմբերի 25-ը՝ անտեսելով կենտրոնական իշխանությունների կարծիքը։