Artsakh Roots Investment Ltd սփյուռքի ներդրումային ֆոնդը 6 տարում Ղարաբաղում մոտ հազար ընտանիքների արտոնյալ վարկեր է տրամադրել։ Այս մասին NEWS.am–ի թղթակցի հետ զրույցում ասել է ֆոնդի մենեջեր Ստեփան Տեր–Պետրոսյանը։
Ֆոնդն օգնում է Քաշաթաղի շրջանի գյուղացիներին։ Վարկերը տրամադրվում են 9 տոկոս տոկոսադրույքով, որոնցից ԼՂՀ կառավարությունը սուբսիդավորում է 3 տոկոսը եւ վարկային երաշխիքներ տրամադրում։ Այսպիսով՝ կարելի է 6 տոկոսով վարկ վերցնել նաեւ անասնաբուծության ու բուսաբուծության համար։ Վարկերից օգտվել են մոտ 20 սիրիահայեր, որոնք հող են մշակում Կովսականում։
«Սովորաբար մենք մինչեւ 1-1.5 մլն դրամ ենք հատկացնում, բայց եթե խոշոր նախագիծը խոստանում է փակել ծախսերը, ապա աշխատում ենք նաեւ նրանց հետ։ Այդպես է եղել 2 սիրիահայերի հետ, որոնց մենք 100 հազար դոլար ենք տվել։ Նրանք ցորենի մեծ դաշտեր են մշակել, հիմա արդեն տեխնիկա են գնել։ Մեծ բերք են ստանում եւ հաջող վաճառում։ Նրանք Ղամիշլիում էլ են հող մշակել»,– հավելեց Տեր-Պետրոսյանը։
Նա արտասահմանցի հայերին կոչ է արել գումար ներդնել հիմնադրամում՝ դրանով օգնելով նաեւ իրենց՝ ստանալով 6 տոկոս շահույթ։