Երեւանում խանդի հողի վրա նախկին ընկերուհու ընկերոջը ծեծի ենթարկելու եւ դանակով հարվածելու մեղադրանքով պայմանական 3 տարվա ազատազրկման դատապարտված Դավիթ Գրիգորյանի համար մեղադրողն ավելի խիստ պատիժ է պահանջում: Մեղադրող Ա. Մուրադյանը դիմել է Վերաքննիչ դատարան՝ պահանջելով վերացնել Առաջին ատյանի դատարանի դատավճիռը եւ Դավիթ Գրիգորյանին վերցնել կալանքի տակ:
Դավիթ Գրիգորյանին մեղադրանք է առաջադրվել այն բանի համար, որ նա 2016թ. օգոստոսի 26-ին ժամը 23:30-ի սահմանում, Երեւան քաղաքի Աէրացիա 2/7 և 2/8 շենքերի միջնամասում, խանդի հողի վրա իր նախկին ընկերուհու` Հայարփի Հովհաննիսյանի հետ շփվելու հարցի շուրջ վիճաբանել է վերջինիս ընկեր Դավիթ Խաչիբաբյանի հետ, որի ընթացքում նախ բռունցքով, այնուհետև իր մոտ գտնվող դանակով դիտավորությամբ բազմաթիվ հարվածներ է հասցրել վերջինիս մարմնի տարբեր մասերին` նրա առողջությանը դիտավորությամբ պատճառելով կյանքին վտանգ սպառնացող ծանր վնաս:
Նրան մեղադրանք է առաջադրվել ՔՕ 112-րդ հոդվածի 1-ին մասով՝ դիտավորությամբ առողջությանը ծանր կամ միջին ծանրության վնաս պատճառելը: