ԱՄՆ Սենատը հավանություն է տվել 2018 թվականի պաշտպանական բյուջեի նախագծին, որով նախատեսված է 500 մլն դոլարի հատկացում Ուկրաինային անվտանգության եւ պաշտպանության ոլորտում աջակցելու համար: Այս մասին Ուկրաինայի նախագահ Պյոտր Պորոշենկոն հայտնել է Twitter-ում:
Պորոշենկոն հայտնել է նաեւ, որ օրենքի նախագծով թույլատրվում է Ուկրաինային պաշտպանական բնույթի մահաբեր սպառազինության տրամադրումը:
«Օրենսդրական մակարդակով առաջին անգամ է առաջարկվում Ուկրաինային այսպիսի պաշտպանական միջոցներ տրամադրել՝ հակաօդային պաշտպանության եւ ջրի վրա իրավիճակին հետեւելու ռադիոտեղորոշման միջոցներ, ռազմածովային հակաականային միջոցներ, առափնյա պահպանության նավեր»,- նշված է Պորոշենկոյի հաղորդագրության մեջ, փոխանցում է Korrespondent.net-ը:
