Մեկ տարին բավարար չէ, որ քաղաքացու կյանքը որակապես փոխվի: Այս մասին այսօր՝ սեպտեմբերի 19-ին, Հայաստան-Սփյուռք համահայկական 6-րդ համաժողովի ժամանակ լրագրողների հետ ճեպազրույցում ասաց վարչապետ Կարեն Կարապետյանը:
«Դուք Կառավարության աշխատանքն ինչպիսի՞ գնահատականներով եք կարծիք կազմում: Ձեր մաշկի զգացողությունն ուրիշ է, մեկ ուրիշինը՝ այլ: Հարգելի լրագրողներ, ամբողջ աշխարհն ընդունել է հայտանիշների համակարգ, մենք այս մեկ ամիսը սկսել ենք հաշվետվություններ տալ եւ ձեզ նույնպես ներկայացնում ենք: Ընթացիկ մեր ցուցանիշները լավագույնն են ԵՏՄ-ում, տարածաշրջանում, ԱՊՀ-ում, ով ինչ է զգացել իր մաշկի վրա, շատ սուբյեկտիվ է: Որեւիցե երկիր չկա, որ բոլորն ապահովված լինեն, յուրաքանչյուր քաղաքացի ուզում է, որ իր կյանքը որակապես փոխվի, մեկ տարին բավարա՞ր է դրա համար, ոչ»,- ասաց Կարեն Կարապետյանը:
Հայաստանի սոցիալական վատ վիճակի մասին հարցերը կարծես վարչապետին հունից հանեցին՝ այդ հարցերը որ տալիս եք, ի՞նչ է փոխվելու ձեր կյանքում դրանից:
