Եվրամիությունը որոշել է թարմացնել եւ ուժեղացնել կիբերանվտանգության միության ռազմավարությունը՝ կապված վերջին կիբերհարձակումների հետ: Այս մասին Բրյուսելում կայացած մամուլի ասուլիսի ժամանակ հայտնել է Անվտանգության միության հարցերով եվրահանձնակատար Ջուլիան Քինգը, փոխանցում է ՏԱՍՍ-ը:
«Մենք կիբերանվտանգության ռազմավարություն ունենք 2013 թվականից: Սակայն վերջին հարձակումները ցույց տվեցին, որ անհրաժեշտ է այն թարմացնել եւ ուժեղացնել»,- ասել է նա:
ԵՄ նոր ռազմավարության առաջնահերթություններից մեկը պետք է լինի Կիբերանվտանգության եվրոպական գործակալության ստեղծումը՝ գոյություն ունեցող ցանցային եւ տեղեկատվական անվտանգության գործակալության հիմքի վրա: «Գործակալությունը կիբերհարձակումների կանխման եւ դրանց արձագանքելու նպատակով անդամ երկրներին օգնելու համար մշտական մանդատ կստանա»,- նշված է Եվրահանձնաժողովի հայտարարության մեջ:
Նշվում է, որ նոր գործակալությունն ամբողջ Եվրամիությունում կիբերպաշտպանության ամենամյա վարժանքներ կանցկացնի: