«Ռոսատոմ» պետական կորպորացիան սկսել է շինարարական աշխատանքներ իրականացնել այն հրապարակում, որտեղ կառուցվելու է Թուրքիայի «Ակույու» առաջին ատոմային էլեկտրակայանը։ Այս մասին լրագրողներին հայտնել է Ռոսատոմի ղեկավար Ալեքսեյ Լիխաչեւը ՄԱԳԱՏԷ-ի գլխավոր համաժողովի 61-րդ նստաշրջանի ժամանակ, փոխանցում է ՏԱՍՍ-ը։
«Շինարարական աշխատանքներն արդեն սկսվել են՝ այդ թվում հիդրոտեխնիկական կառույցների շինարարությունը»,- ասել է նա։
Լիխաչեւը հիշեցրել է, որ Ռոսատոմը հույս ունի մինչեւ տարեվերջ ստանալ Թուրքիայում առաջին ատոմային էլեկտրակայան կառուցելու արտոնագիր։ «Քանի որ Թուրքիայում մենք աշխատում ենք անմիջականորեն կանոնակարգողի հետ, մենք հույս ունենք արդեն այս տարի ստանալ արտոնագիրը։ Բայց ընդհանուր շինարարությունն արդեն լիարժեք ընթանում է, դրա համար էլ լավատեսաբար ենք տրամադրված»,- ասել է Լիխաչեւ ը։
Ռուսաստանն ու Թուրքիան 2010-ին ստորագրել են միջկառավարական համաձայնագիր՝ Թուրքիայում «Ակույու» ԱԷԿ-ի շինարարության ու շահագործման մասին։ Նախագիծը, որը գնահատվում է 20 մլրդ դոլար, նախատեսում է չորս էներգաբլոկների կառուցում՝ 4800 ՄՎտ ընդհանուր հզորությամբ։ «Ակույու» ԱԷԿ-ի առաջին բլոկը Ռոսատոմը հույս ունի գործարկել արդեն 2023-ին։
