Երեւանն ունի պոտենցիալ ժամանակակից ոսկերչության մայրաքաղաք դառնալու: NEWS.am-ի հետ զրույցում նման կարծիք հայտնեց ֆրանսահայ ոսկերիչ Թիերի Վենդոմը, որն այս օրերին Հայաստանում է՝ մասնակցելու Հայաստան-Սփյուռք համահայկական 6-րդ համաժողովին:
«Փարիզը բարձրակարգ ոսկերչության մայրաքաղաքն է, Ժնեւը ժամացույցների մայրաքաղաքն է, Բրյուսելը շոկոլադի մայրաքաղաքն է, Երեւանն էլ պետք է լինի ոսկերչության մայրաքաղաքը, որովհետեւ ոսկերչությունը հենց հայերինն է»,- ասաց նա:
Վենդոմի խոսքով, Հայաստանն իհարկե լավ որակ է ցույց տալիս, սակայն սա բավարար չէ. հայաստանցի մասնագետները պետք է նոր հմտություններ ձեռք բերեն եւ զարգացնեն իրենց գիտելիքները:
«Պետք է շուկան այնպես զարգացնել, որ տուրիստները նաեւ այդ նպատակով Հայաստան գան, տուրիստը պետք է արտիստի աշխատանք տեսնի: Կարծում եմ՝ անհրաժեշտ է ոճը դարձնել ժամանակակից: Մենք բոլոր նախապայմաններն ունենք դրա համար, հենց միայն փիրուզը, որի նմանն աշխարհում չկա»,- նշեց Թիերի Վենդոմը: