Երեւանում սեպտեմբերի 14-ի կեսօրին հնչած կրակոցներից վիրավորված 39-ամյա Վահագն Աբգարյանին սեպտեմբերի 26-ին դուրս կգրեն հիվանդանոցից: Այս մասին NEWS.am-ին ասաց «Աստղիկ» բժշկական կենտրոնի գլխավոր բժիշկ Ռոբերտ Կուրղինյանը: Նա նշեց, որ Վահագն Աբգարյանը այժմ հիվանդասենյակում է, նա արդեն քայլում է, առողջական վիճակը բավարար է:
Վահագն Աբգարյանի անվտանգությունը հսկում են ոստիկանության աշխատակիցները:
Նա ստացել էր կրծքավանդադակի աջ կողմի վնասվածք, աջ նախաբազկային հատվածում ոսկրի վնասում: Նրա կյանքին վտանգ չի սպառնում, հետվիրահատական բարդություններ չկան:
Ավելի վաղ NEWS.am-ը հայտնել էր, որ Երեւանի կենտրոնում Վերնիսաժի հարեւանությամբ, Թուֆենկյան հյուրանոցի մուտքի մոտ սեպտեմբերի 14-ին, ժամը 13.25-ի սահմաններում կրակոցներ են հնչել, ինչի հետեւանքով կան վիրավոր եւ մեկ սպանված:
Սպանվածը 43-ամյա Գարիկ Մոսինյանն է, իսկ վիրավորը՝ 39-ամյա Վահագն Աբգարյանը: Նրանք Ալավերդի քաղաքից են, քրեական աշխարհի ներկայացուցիչներ: Սպանության մեջ կասկածվում է երեք անձ. 60-ամյա Ռաֆիկ Խաչատրյանը, 35-ամյա Ալբերտ Բլբուլյանը եւ 33-ամյա Արմեն Կարադավիդովը: