Ռուսաստանի ռազմական ոստիկանության դասակը հայտնվել է ահաբեկիչների պաշարման մեջ Իդլիբ շրջանում, ոստիկանները մի քանի ժամ հետ են մղել հարձակումները տեղացիների Մուալի ցեղի մարտիկների հետ միասին, լրագրողներին այդ մասին հայտնել է Ռուսաստանի ԶՈՒ Գլխավոր շտաբի օպերատիվ վարչության ղեկավար, գեներալ- գնդապետ Սերգեյ Ռուդսկոյը, նշելով, որ նրանց պաշարումից ազատել է հատուկ ջոկատը՝ ավիացիայի աջակցությամբ, փոխանցում է ՌԻԱ Նովոստին։
«Զինյալների գործողությունների գլխավոր նպատակներից մեկն է եղել ռուսական ռազմական ոստիկանության ստորաբաժանման գրավումը, որը կատարում էր առաջադրանքներ դիտակետում, որն այդ շրջանում է տեղակայված դեէսկալացիայի հսկողության համար»,- ասել է Ռուդսկոյը։
Նրա խոսքով՝ զինյալների հարձակման հետեւանքով «ռազմական ոստիկանության դասակը՝ թվով 29 մարդ, արգելափակված է մնացել մի քանի ժամ ու հետ է մղել հակառակորդի գերազանցող ուժերը՝ մուալի ցեղի հետ միասին, որը հրադադարին միանալու մասին համաձայնագիր է ստորագրել ու հավատարիմ է մնացել դրան այս բարդ իրավիճակում»։ «Ահաբեկիչների վրա ավիացիան հարվածներ է հասցրել։ Արգելաբացման ջոկատի գործողություններին մշտապես աջակցում էին երկու «Սու- 25» գրոհիչներ, որոնք հարվածներ են հասցրել կենդանի ուժի ու զրահատեխնիկայի վրա՝ հնարավորինս փոքր բարձրություններից»,- ասել է Ռուդսկոյը։
Ինչպես նշել է ԳՇ Գլխավոր օպերատիվ վարչության ղեկավարը՝ «արդյունքում շրջափակման օղակը ճեղքվել է ու ռուսական դաշնության զինված ուժերի ստորաբաժանումներն առանց կորուստների շարժվել են դեպի կառավարական զորքերի տեղակայման շրջան»։ «Գործողության ընթացքում վիրավորում են ստացել երեք զինծառայողներ»,- նշել է նա։