Նյու Յորքում մեկնարկել է ՄԱԿ-ի Գլխավոր վեհաժողովի 72-րդ նստաշրջանը, որին մասնակցում է նաեւ Սերժ Սարգսյանը: Հայաստանի նախագահը ելույթը սկսել է ղարաբաղյան հակամարտությանն ու Ադրբեջանին անդրադարձով: Նա արձանագրել է. հայատյացությունը շարունակում է Ադրբեջանի պետական քաղաքականության բաղկացուցիչ մաս կազմել: Սերժ Սարգսյանը ՄԱԿ-ի ամբիոնից խոսել է նաեւ 2016 թվականի ապրիլյան պատերազմի մասին՝ հայտարարելով, որ 1992-94 թվականների ծանր պատերազմն ու դրա հետեւանքները դաս չեղան Բաքվի համար: Արդյունքում Ադրբեջանը եւս մեկ լայնածավալ ռազմական գործողություն սկսեց: Արցախը, Հայաստանի նախագահի պնդմամբ, չի կարող ավելի ցածր կարգավիճակ եւ ավելի քիչ ազատություն ունենալ, քան այսօր ունի:
Խոսելով Հայաստանի ու Թուրքիայի հարաբերությունների մասին՝ Սերժ Սարգսյանն անդրադարձել է Ցյուրիխի արձանագրություններին: Հիշեցրել է. հենց Հայաստանի նախաձեռնած գործընթացի շնորհիվ են 2009 թվականին կնքվել հայ-թուրքական արձանագրությունները, որոնք, սակայն, թղթի վրա են մնացել: Հայաստանի նախագահի խոսքը Թուրքիային ուղղված վերջնագրի նման է հնչել:
«Սասնա ծռերի» 14 անդամների գործով 11 պաշտպաններ գործադուլ են հայտարարել եւ չեն մասնակցել այսօրվա դատական նիստին: Պատճառը չի փոխվել. բողոքում են փաստաբանների զննության դեմ՝ այն խուզարկություն որակելով: Նախ պաշտպաններ Արայիկ Պապիկյանն ու Մուշեղ Շուշանյանը հրաժարվել են խուզարկությունից եւ չեն կարողացել մասնակցել նիստին: Գործով մյուս պաշտպաններն էլ միջնորդություն են ներկայացրել՝ պահանջելով վերանայել դատական կարգադրիչների գործելաոճը եւ թույլ տալ, որ բոլորն առանց խոչընդոտների ներկայանան նիստին: Արտուշ Գաբրիելյանը սրան արձագանքել է բացակա փաստաբանների նկատմամբ դատական սանկցիա կիրառելով: Իրավիճակը չի փոխվել նաեւ հայտարարված ընդմիջումից հետո: Արդյունքում նիստը հետաձգվել է:
Հայաստանի եւ Թուրքիայի սահմանին թուրք սահմանախախտի են ձերբակալել: Սահմանն ապօրինի հատած անձին ձերբակալել են Արտաշատի սահմանապահ ջոկատի տեղամասում՝ Եղեգնավան բնակավայրի շրջանում: Նա 1972 թվականին ծնված Թուրքիայի քաղաքացի է: Ձերբակալվածը պատմել է, որ Իգդիրի Գյոդաքլը բնակավայրի հովիվն է, իսկ սահմանը հատել է՝ հոտից հետ մնացած անասուններին փնտրելու համար: Իրավապահները ստուգում են այս վարկածը:
Երեւանում են դերասանուհի Օրնելլա Մուտին, կոմպոզիտոր Միշել Լեգրանը, հոլիվուդյան դերասան Մարկո Խանն ու այլ հայտնիներ: Նրանք երեկ մասնակցել են Հայաստանի անկախության 26-ամյակին նվիրված համերգին: Եվ եթե Օրնելլա Մուտիի եւ Միշել Լեգրանի մասին շատերը գիտեն, նրանք էլ առաջին անգամ չէ, որ Հայաստան են այցելում, ապա քչերը գիտեն Հոլիվուդյան դերասան Մարկո Խանի հայկական արմատների մասին: Հայազգի դերասանն առաջին անգամ է հայրենիքում, բայց խոստանում է՝ գալու է Հայաստանում ապրելու: Հավելենք, որ Մարկո Խանը նկարահանվել է «Կարիբյան ծովի ծովահենները», «Երկաթե մարդը», «X-Ray ճամբար», «10 000 տարի մ.թ.ա.» եւ այլ ֆիլմերում:
Դոլարն էժանացել է, եվրոն եւ ֆունտը՝ թանկացել: Արդյունքում սեպտեմբերի 20-ին դոլարի փոխարժեքը կազմել է 478 դրամ, ֆունտինը՝ 647, եվրոյինը՝ 574 դրամ, ռուբլունը՝ 8 դրամ 26 լումա:
Սեպտեմբերի 21-ին հանրապետությունում սպասվում է առանց տեղումների եղանակ: Օդի ջերմաստիճանը սեպտեմբերի 23-25-ը 3-4 աստիճանով կնվազի: Երեւանում վաղը տեղումներ չեն սպասվում: Մայրաքաղաքում գիշերը կդիտվի +17+19, ցերեկը՝ +32+34 աստիճան տաքություն: