«Տավուշ տեքստիլ» կարի ձեռնարկությունը պատրաստվում է 600 նոր աշխատատեղ ստեղծել սահմանամերձ Բերդ քաղաքում: Այս մասին սեպտեմբերի 21-ին լրագրողների հետ հանդիպման ժամանակ հայտնեց «Տավուշ տեքստիլ» ԲԲԸ տնօրեն Միքայել Եզեկյանը:
Տավուշում ձեռնարկությունն արդեն 3 ֆաբրիկա է հիմնել, որոնց հիմնական արտադրանքը աշխատանքային ձեռնոցներն են: Տարեկան արտահանում է 3 մլն զույգ, հիմնականում՝ Ռուսաստան, փոքր ծավալներով՝ Ուկրաինա: Ընկերության հիմնադիր ռուսաստանցի ձեռնարկատեր Սուրեն Երիցյանի խոսքով՝ հիմա բանակցություններ են վարվում ԱՄՆ եւ արաբական երկրներ արտահանելու համար:
Ընկերության արտադրանքը ներկայացվում է նաեւ Ռուսաստանում պետական մրցույթներին՝ միջնորդ ընկերությունների միջոցով, որոնք պատասխանատու են աշխատանքի անվտանգության համար: Մասնավոր գնորդների թվում են արդեն այնպիսի ընկերություններ, ինչպիսին «Ռոսնեֆտն» է: