Եթե Հայաստանում կարծում են, որ թուրքերն իրականում չեն ընդունում Հայոց ցեղասպանությունը, ապա Թուրքիայում էլ են այդպես կարծում։ Այս մասին Երեւանում սեպտեմբերի 21-ին՝ լրագրողների հետ հանդիպմանը, հայտարարել է թուրք լրագրող Ալի Բայրամօղլուն։
Նրա խոսքով՝ Թուրքիայում էլ շատերը կարծում են, որ եթե իրենց երկրում ինչ-որ մեկը խոսում է հայերի Ցեղասպանության մասին, նա իսկական թուրք չէ, այլ քուրդ, ծպտյալ հայ կամ ինչ-որ այլ ազգ։
«Մեզ մոտ էլ են այդպես կարծում»,-ժպտալով ասում է նա։
Թուրքերի մասին հայկական ասացվածքներ լրագրողը չգիտի, ինչպես նաեւ հակառակը, բայց նրա կարծիքով ժամանակակից մարդիկ այդպես չեն գնահատում ամբողջ ազգին։
«Կան տարբեր հայեր եւ թուրքեր։ Կան ժողովրդավարություն ցանկացող թուրքեր, կամ անհանդուրժողներ։ Կան նաեւ տարբեր հայեր։ Ես հավատացած եմ, որ մեր հասարակությունների ժողովրդավար տրամադրված հատվածները կարող են միմյանց հետ լեզու գտնել»,-ավելացրել է Բայրամօղլուն։
