ԱՄՆ Կոնգրեսի Ներկայացուցիչների պալատի անդամ Ադամ Շիֆը եւս 7 անդամների հետ միասին նամակ է հղել Քալիֆորնիայի խոշոր հրատարակիչներին՝ նրանց կոչ անելով դասագրքերում եւ ուսումնական այլ նյութերում Հայոց ցեղասպանության վերաբերյալ լրացուցիչ տեղեկություններ ընդգրկել, հայտնում է Massis Post-ը:
Շիֆի խոսքով՝ դասագրքերում Հայոց ցեղասպանության մասին լրացուցիչ տեղեկությունները աշակերտներին կօգնեն Ցեղասպանության մասին տեղեկանալ ոչ միայն որպես պատմական իրադարձություն այլ նաեւ ցեղասպանությունների, էթնիկ զտումների եւ մարդու իրավունքների համակարգային խախտումների ավելի լայն համատեքստում:
Նա շեշտել է, որ Քալիֆորնիան Հայոց ցեղասպանության հետազոտության խրախուսման նախաձեռնություն է ստանձնել, ուստի դա դասագրքերի հրատարակիչներից կպահանջի նոր տեքստերի մշակում, որոնք Ցեղասպանության պատմությունը կներկայացնեն ինչպես հարկն է:
Նամակը ստորագրել են նաեւ Ներկայացուցիչների պալատի անդամներ Ջեքի Սփեյերը, Աննա Էշուն, Ջուդի Չուն, Գրեյս Նապոլիտանոն, Զոի Լոֆգրենը, Բրեդ Շերմանը եւ Ալան Լովենթալը: