Ես մի քանի տարի առաջ սիրահարվեցի Հայաստանին: Սեպտեմբերի 21-ին Երեւանում լրագրողների հետ զրույցում այս մասին ասաց Չեխիայի խորհրդարանի պատգամավոր, Չեխիա-Հայաստան բարեկամության միջխորհրդարանական խմբի նախագահ Ռոբին Բյոնիխը, որն արժանացել է նախագահ Սերժ Սարգսյանի բարձրագույն պարգեւին՝ Հայոց ցեղասպանության ճանաչման գործում ավանդի համար:
Չեխ պատգամավորի առաջին այցը Հայաստան տեղի է ունեցել 2008 թվականին: «Ես այս երկիրը շատ եմ սիրում, եւ հավանաբար, սա է պատճառը, թե ինչու եմ այսօր այստեղ»,- նշեց Բյոնիխը:
Ի պատասխան NEWS.am-ի այն հարցին, թե ո՞րն է իր կոչը այն երկրներին, որոնք դեռեւս չեն ճանաչել Հայոց ցեղասպանությունը, մասնավորապես՝ Թուրքիային, պատգամավորն ընդգծեց. «Այս հարցում առանցքային բառը «ինչու»-ն է: Ինչո՞ւ դուք չեք ճանաչում ճշմարտությունը: Սա պատմական փաստ է»:
Հիշեցնենք, որ 2017 թվականի ապրիլի 25-ին Չեխիայի խորհրդարանի ստորին պալատը, պատգամավորների պալատը բանաձեւ է ընդունել, որով, փաստորեն, ճանաչել է 1915 թվականին Օսմանյան Թուրքիայում Հայոց ցեղասպանությունը:
