Թուրքիայի խորհրդարանը արտակարգ նիստ կգումարի՝ Իրաքյան Քուրդիստանի անկախացման մասին հանրաքվեի կապակցությամբ, որը սեպտեմբերի 25-ին է ծրագրված, փոխանցում է AP-ն։
Արդարություն ու զարգացում իշխող կուսակցության պատգամավոր Մուսթաֆա Էլիթասը հայտնել է, որ խորհրդարանը նիստ կգումարի սեպտեմբերի 23-ին, որպեսզի քննարկի հանրաքվեն, որն Անկարան համարում է սպառնալիք ազգային անվտանգությանը։
Լրատվամիջոցների հաղորդագրությունների համաձայն՝ օրենսդիրները կքվեարկեն մանդատի երկարացման օգտին, որը թույլ կտա թուրք զինվորականներին մտնել Իրաք։ Մանդատի գործողության ժամկետը սպառվում է հաջորդ ամիս։
Վաղը կկայանա Թուրքիայի կառավարության նիստը, որտեղ քննարկվելու են հանրաքվեից հետո պատասխան քայլերը։
Այս շաբաթ թուրք զինվորականները սկսել են Իրաքի հետ սահմանին չհայտարարված զորավարժություններ։
