Թուրքիայի իշխանությունները 14 փաստաբանների մեղադրել են «զինված ահաբեկչական կազմակերպությանն» անդամակցելու մեջ։ Նման մեղադրանք է առաջադրվել անցած շաբաթ ձերբակալված 16 փաստաբաններից 14-ին։ DW-ը հայտնում է, որ փաստաբաններին մեղադրել են Հեղափոխական ժողովրդական ազատագրման կուսակցության հետ կապերի մեջ, որին Անկարայի իշխանությունները համարում են ահաբեկչական կազմակերպություն։
Նշենք, որ բոլոր կալանավորված փաստաբանները աշխատում են իրավաբանական ընկերությունում, որը պաշտպանում է այն երկու ուսուցիչների շահերը, որոնք հացադուլ են հայտարարել՝ որպես բողոքի նշան զանգվածային կրճատումների ու կալանավորումների դեմ , որոնք սկսվել էին անցած տարվա պետհեղաշրջման փորձից հետո։ Ուսուցիչներին նույնպես մեղադրել էին ահաբեկիչների հետ կապերի մեջ։ Այս գործը հանրային մեծ արձագանք է ստացել Թուրքիայում։ Ավելի քան 2000 փաստաբան ուսուցիչների շահերը պաշտպանելու պատրաստակամություն է հայտնել։ Սակայն մինչեւ դատական նիստը բոլոր փաստաբանները, որոնք պաշտպանում էին ուսուցիչների շահերը, կալանավորվել են։ Բացի այդ՝ ամբաստանյալները նույնպես ներկա չեն եղել դատական նիստին։ Իշխանությունները հայտնել են, որ նրանք կարող են փախչել, չնայած բժիշկները նրանց վիճակը գնահատել էին որպես «վտանգավորության աստիճանի թույլ»։