Անհրաժեշտ է ուսումնասիրել Հայաստանի գյուղատնտեսության ոլորտում 2017–ի առաջին ութ ամիսներին գրանցված անկման պատճառները։ Այս մասին հայտարարել է ՀՀ վարչապետ Կարեն Կարապետյանը սեպտեմբերի 22–ին կայացած Կառավարության նիստի ժամանակ։

Նա գյուղատնտեսության, տարածքային կառավարման եւ զարգացման նախարարներին, ինչպես նաեւ մարզպետներին հանձնարարել է երկշաբաթյա ժամկետում ամփոփել վիճակագրական տվյալների արդյունքները եւ վերլուծել դրանք։  

Վերջնական տվյալները դեռեւս չեն ամփոփվել, սակայն ըստ նախնական տվյալների՝ 2016–ին գրանցված անկումը նկատվում է նաեւ 2016–ի օգոստոս–2017-ի օգոստոս, ինչպես նաեւ հունվար–օգոստոս ամիսներին։  «Աճ է նկատվում բոլոր ոլորտներում՝ բացառությամբ գյուղատնտեսության եւ շինարարության։ Շինարարությունը պետք է աշխուժանա ձմռան ընթացքում աշխատանքներ կատարելու թույլտվության շնորհիվ։ Ինչ վերաբերում է գյուղատնտեսությանը, այստեղ անհրաժեշտ է հասկանալ անկման  պատճառները»,– հավելել է վարչապետը։

Ըստ վերջին հրապարակված տվյալների՝ հունվար–հուլիս ժամանակահատվածում գյուղատնտեսության ոլորտում անկումը կազմել է 2.1 տոկոս։